ნეტგაზეთი • RU

სტეფანია ექსპრესი – უკრაინაში მატარებელს სიმღერის სახელი უწოდეს ევროვიზიაზე გამარჯვების შემდეგ

უკრაინაში მატარებელს, რომელიც კიევი – ივანო ფრანკოვსკის მიმართულებით მოძრაობს, წელს „სტეფანია ექსპრესი“ ერქმევა. ეს სახელწოდება #43 მატარებელმა მიიღო უკრაინული ჯგუფის, Kalush Orchestra-ს „ევროვიზიაზე“ გამარჯვების შემდეგ, სადაც ჯგუფმა შეასრულა სიმღერა „სტეფანია“.

ამის შესახებ უკრაინის რკინიგზის ადმინისტრაციის ხელმძღვანელი, ალექსანდრ კამიშინი წერს ტელეგრამზე. მისივე თქმით, კიევის, კალუშის და ფრანკოვსკის სადგურებზე ამ მატარებელს სიმღერით – Stephanie, შეხვდებიან.

როგორც ალექსანდრ კამიშინი წერს, ეს იქნება პირველი მატარებელი მსოფლიოში, რომელსაც დედის პატივსაცემად დაარქვეს სახელი.

14 მაისს 2022 წლის ევროვიზიის გამარჯვებული უკრაინული ჯგუფი Kalush Orchestra გახდა სიმღერით – Stefania.

ევროვიზიის ფინალში სიმღერის შესრულების შემდეგ უკრაინელმა შემსრულებლებმა მსოფლიოს სცენიდან მიმართეს და „აზოვსტალის“ დახმარება სთხოვეს.

„ყველას გთხოვთ, დაეხმარეთ უკრაინას, მარიუპოლს! დაეხმარეთ „აზოვსტალს“, ახლავე!“, – მიმართეს მსოფლიოს უკრაინელმა კონკურსანტებმა.

როგორც ჯგუფი წერს იუთუბის არხზე, სიმღერა ავტორმა დედას მიუძღვნა, თუმცა რუსეთის უკრაინაზე თავდასხმის შემდეგ ამ სიმღერამ ახალი მნიშვნელობა შეიძინა.

„მიუხედავად იმისა, რომ სიმღერაში არაფერია ნათქვამი ომის შესახებ, ბევრმა დაიწყო სიმღერის ასოცირება დედა უკრაინასთან. უფრო მეტიც, საზოგადოებამ მას ჩვენი ომის ჰიმნი უწოდა!თუ სტეფანია ახლა ჩვენი ომის ჰიმნია, ვისურვებდი, რომ ის ჩვენი გამარჯვების ჰიმნი გახდეს“ – წერს Kalush Orchestra.

„ევროვიზიაზე“ გამარჯვების შემდეგ უკრაინულმა ჯგუფმა სიმღერის ახალი კლიპი გამოაქვეყნა, რომელიც გადაღებულია უკრაინაში, ომისგან ყველაზე მეტად დაზარალებულ ქალაქებში: ბუჩაში, ირპინში, ბოროდიანკაში, გოსტომელში და ა.შ.

__________________

ფოტო: EPA-EFE/ALESSANDRO DI MARCO

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com