დილიდან ხმაურია ბათუმის იუსტიციის სახლში. მოქალაქეებს, რომლებიც პირადობის მოწმობების ასაღებად მივიდნენ, უთხრეს, რომ დღეს პირადობებს ძველი ტარიფით ვერ გააკეთებდნენ, რადგან შაბათია. მას შემდეგ, რაც მოქალაქეებმა პროტესტი გამოთქვეს, ბათუმის იუსტიციის სახლში პოლიცია გამოიძახეს.
დღეს, 30 აპრილს, ბოლო დღეა, როცა მოქალაქეებს პირადობის მოწმობა 30 ლარად შეუძლიათ აიღონ. ხვალიდან, პირველი მაისიდან კი ელექტრონული პირადობის მოწმობის საფასური ორმაგდება და 60 ლარი იქნება.
ინფორმაცია იმის შესახებ, რომ პირადობის დამადასტურებელი დოკუმენტის აღება ძვირდებოდა გუშინ, 29 აპრილს, დღის მეორე ნახევარში გახდა ცნობილი. მოქალაქეებს, ვისაც პირადობის მოწმობის აღება ან განახლება სურდათ, არ მიეცათ გონივრული ვადა, რომ ძველი ტარიფით ესარგებლათ.
როგორც „ბათუმელებს“ იუსტიციის სახლში მყოფმა ერთ-ერთმა მოქალაქემ უთხრა, სწორედ ამას აპროტესტებს ბათუმის იუსტიციის სახლში პირადობის მოწმობის ასაღებად მისული ოცამდე მოქალაქე. ისინი ითხოვენ, რომ იუსტიციის სახლი მათ ძველი ტარიფით მოემსახუროს.
„ბათუმელები“ ცდილობს დაუკავშირდეს იუსტიციის სამინისტროს პრესსამსახურს, რომელიც ზარებსა და შეტყობინებებზე არ გვპასუხობს. გამოცემა იუსტიციის სახლის განმარტებას მიღებისთანავე შემოგთავაზებთ.
ცნობისათვის, ხვალიდან, პირველი მაისიდან, ელექტრონული პირადობის მოწმობის საფასური 60 ლარამდე ძვირდება, ხოლო ბიომეტრიული პასპორტის ფასი – 150 ლარამდე.
ამ ფასებში არ შედის ფოტოს საფასური – 5 ლარი. აქამდე პირადობის მოწმობის აღება 30 ლარი ღირდა, ხოლო პასპორტის – 100 ლარი.
