Batumelebi | ნურის ტბა ისევ დაბინძურებულია – ტბას ლაბორატორიულად ამოწმებენ ნურის ტბა ისევ დაბინძურებულია – ტბას ლაბორატორიულად ამოწმებენ – Batumelebi
ნეტგაზეთი • RU

ნურის ტბა ისევ დაბინძურებულია – ტბას ლაბორატორიულად ამოწმებენ

ბათუმის ცენტრალურ პარკში ნურის ტბა ისევ დაბინძურებულია.

„ბათუმის წყალში“ აცხადებენ, რომ დათბობასთან ერთად დაიწყო ტბაში წყალმცენარეების გამრავლება და ტბის დაბინძურებაც ამას უკავშირდება.

„ჩვენ ვახორციელებთ ყოველდღიურ მონიტორინგს როგორც ნურის, ასევე არდაგანის ტბაზე. ნურის ტბის ეკოლოგიური მდგომარეობის უზრუნველსაყოფად რეგულარულად ხდება დათბობის შედეგად გავრცელებული წყლის მცენარეების ამოღება, რაც წყალში ჟანგბადის გადაჭარბებულად მოხმარებას შეაფერხებს. შედეგად, შენარჩუნდება წყლის შესაბამისი ეკოლოგიური მდგომარეობა.

ტბები იწმინდება როგორც მექანიკურად, ასევე საჭიროების შემთხვევაში – სპეცტექნიკის საშუალებით. კომპანიას ჰყავს მყვინთავებიც. ნურის ტბაზე მუშაობს აერაციის სისტემაც“, – გვითხრეს „ბათუმის წყალში“.

ნურის ტბა / 21.04.2022

„ბათუმის წყალში“ ასევე აცხადებენ, რომ ატარებენ ლაბორატორიულ შემოწმებასაც და ორივე ტბაში წყლის ხარისხი ნორმის ფარგლებშია.

ნურის ტბა / 21.04.2022

რაც შეეხება თევზაობას, „ბათუმის წყლის“ ინფორმაციით, ტბაში ანკესის გარდა, სხვა საშუალებებით თევზაობა აკრძალულია.

„თევზაობის მოყვარულებს ანკესით თევზაობას ვერ აუკრძალავ. მით უმეტეს, ის პრობლემა, რაც ადრე იყო ტბაში, აღარ დგას. ამიტომ აქ დაჭერილი თევზი ჯანმრთელობისთვის საფრთხეს არ შეიცავს“, – გვითხრეს კომპანიაში.

ნურის ტბა / 21.04.2022 / გურამ მურვანიძის ფოტოები


ბათუმში, ნურიგელის ტბაზე, ასევე არდაგანის ტბის მიმდებარედ არსებულ პლაჟზე,  ვეიკპარკის მოწყობა სურთ.

ამავე თემაზე „ბათუმელების“ არქივიდან:

ქოლერა ბათუმში და დაშრობას გადარჩენილი „მკვლელი” ტბა

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com