რუსეთს ზაპოროჟიეს რეგიონში ქიმიური იარაღის – თეთრი ფოსფორის ბომბის გამოყენებაში ადანაშაულებს უკრაინა. ამის შესახებ ფეისბუქზე უკრაინის რეგიონული სამხედრო ადმინისტრაციის პრესსპიკერმა ივან არიეფიევმა განაცხადა.
„პოლოგის რაიონის სოფელ ნოვოდანილივკაში ფოსფორიანი საბრძოლო მასალის საარტილერიო დაბომბვის შედეგად ხრუსტალკოვას ქუჩაზე მდებარე საცხოვრებელ კორპუსს ცეცხლი გაუჩნდა. ზაპოროჟიეს რეგიონში საგანგებო სიტუაციების სახელმწიფო სამსახურმა ხანძრის ლიკვიდირება შეძლო. არავინ დაშავებულა“, – ნათქვამია განცხადებაში, რომელსაც გამოცემა „ურკინფორმი“ ავრცელებს ივან არიეფიევზე დაყრდნობით.
განცხადების მიხედვით, პოლოგის მიმართულებით მტერი ცდილობს ოკუპირებული ტერიტორიის შენარჩუნებას, ახორციელებს საჰაერო დაზვერვას უპილოტო საფრენი აპარატების გამოყენებით და მრავალჯერადი სარაკეტო გამშვები პუნქტიდან ბომბავს უკრაინის სამხედროებსა და ადგილობრივ მოსახლეობას.
რეგიონული სამხედრო ადმინისტრაციამ დასძინა, რომ დღეს ზაპოროჟიეს რეგიონში მაღალი საფრთხეა, რომ მტერი სარაკეტო იარაღს გამოიყენებს სამხედრო და სამოქალაქო ინფრასტრუქტურის წინააღმდეგ. ასევე არსებობს შესაძლებლობა, რომ რუსი ოკუპანტები ეცდებიან წინსვლას ქალაქ ზაპოროჟიესკენ.
___
მასალა მომზადებულია ukrinform-ზე დაყრდნობით.
მთავარი ფოტო: აფეთქებული ბომბის ნარჩენები
