ნეტგაზეთი • RU

ქალი, რომელიც 9 აპრილს მღეროდა, პრეზიდენტმა ღირსების მედლით დააჯილდოვა

„მინდა მადლობა გადაგიხადოთ ყველას ამ სითბოსთის. მე ყოველთვის ვგრძნობ ადამიანებისგან გაგებულ სითბოს, სიყვარულს… ვეცდები ეს ჯილდო ვატარო ღირსეულად, ვიყო ისეთი შვილი, როგორსაც იმსახურებს ეს დალოცვილი, მადლიანი ქვეყანა, “ – უთხრა დღეს, 9 აპრილს პრეზიდენტ სალომე ზურაბიშვილმა ლელა ვეფხვაძემ, ქალმა, რომელმაც 9 აპრილი ყველას დაამახსოვრა სიმღერით „დაუკარით, რომ ძველ ხანჯალს ელდა ეცეს…“

პრეზიდენტმა სალომე ზურაბიშვილმა დღეს, 9 აპრილს ღირსების მედლით დააჯილდოვა ლელა ვეფხვაძე „საქართველოს დამოუკიდებლობისათვის წარმოებულ ეროვნულ-განმათავისუფლებელ ბრძოლაში მტკიცე სამოქალაქო პოზიციისა და საზოგადოების პატრიოტული სულისკვეთების ამაღლებისთვის“.

პრეზიდენტმა დღესვე ეროვნული გმირის ორდენით დააჯილდოვა და ეროვნული გმირის წოდება მიანიჭა გარდაცვალების შემდეგ პოეტ მიხეილ [მიხა] ხელაშვილს. ეს ჯილდო საქართველოს ეროვნულ ბიბლიოთეკას გადაეცა.

„ჯილდოვდება ორი ადამიანი, რომელიც უკავშირდება დამოუკიდებელი საქართველოს იდეას: უსინათლო მომღერალი ლელა ვეფხვაძე „დაუკარით, რომ ძველ ხანჯალს ელდა ეცეს“. ამ სიმღერით ლელა ვეფხვაძე თავისუფლების სიმბოლო გახდა.  25 წლის ნიჭიერი ფშაველი პოეტი, მიხა ხელაშვილი, რომელმაც სიცოცხლის რისკის ფასად განუხრელად უერთგულა საქართველოს შეფიცულთა იდეას, გახდა დაუმარცხებელი საქართველოს სიმბოლო,“ – აღნიშნეს პრეზიდენტის ადმინისტრაციაში.

 

ნეტგაზეთის მასალების სხვა გამოცემებში გადაბეჭდვის წესი
ავტორი