ინგლისში, კამბრიაში მცხოვრებმა გაბრიელ კლარკმა თავისის ხელით შექმნილი ხის თასი უკრაინელების დასახმარებლად ლატარიაში გაათამაშა და ამ გზით 68 ათასი ფუნტი შეაგროვა. ამის შესახებ BBC წერს. 12 წლის გაბრიელმა უკრაინელებისთვის ფულის შეგროვება მას შემდეგ გადაწყვიტა, რაც ინსტაგრამზე მისი ხის ნაკეთობები პოპულარული გახდა.
ხის თასს წრიულად ორი – ლურჯი და ყვითელი კანტი გასდევს და მისი მფლობელის ვინაობა 17 აპრილს, აღდგომის კვირადღეს გაირკვევა.
გაბრიელს თავიდან მხოლოდ 5 ათასი ფუნტის შეგროვება ჰქონდა განზრახული, თუმცა ლატარიაში მონაწილეთა რაოდენობამ და შემოსულმა თანხამ მის მოლოდინს გადააჭარბა.
„დიდი იმედი მაქვს, რომ ამ ადამიანების დიდსულოვნება დაეხმარება ბავშვებს უკრაინაში, რომლებსაც ომის გამო სჭირდებათ საკვები, წყალი, თავშესაფარი და უსაფრთხო ადგილი, სადაც შეძლებენ სწავლას და თამაშს“, – ამბობს 12 წლის გაბრიელი.
ხეზე მუშაობა გაბრიელის ჰობია. ის თასებს, ბარაბნის ჯოხებს, ხის დაფებს ამზადებს, შეკვეთებიდან მიღებული ფულით კი ახალი ველოსიპედის ყიდვას აპირებს.
გაბრიელი ინსტაგრამმა მას შემდეგ გაიცნო, რაც გასულ თვეში, მამამისმა, რიჩარდ კლარკმა შვილის ხის ნაკეთობების ფოტოები გაავრცელა და მომხმარებლებს სთხოვა, ინსტაგრამზე გაბრიელს ადევნებოდნენ. გაბრიელის ფოლოუერების რიცხვი ერთ თვეში 225 ათას ადამიანამდე გაიზარდა.
