ხელვაჩაურის მერიამ მრავალბინიანი საცხოვრებელი სახლის მშენებლობისთვის საჭირო დეტალური საპროექტო-სახარჯთაღრიცხვო დოკუმენტაციის შესყიდვაზე კონკურსი გამოაცხადა. საკონკურსო თანხა 220 ათასი ლარია. „ბათუმელებს“ ხელვაჩაურის მერიაში უთხრეს, რომ ბინები ეკომიგრანტი ოჯახებისთვის უნდა აშენდეს.
„სტიქიით დაზარალებული ოჯახების განცხადებების მიღება მიმდინარე წელს დასრულდა. სულ 207 განაცხადია შემოსული და აქედან 160 განაცხადი დაკმაყოფილდა, ანუ შემდგომში ბინებს გადასცემენ“, – გვითხრეს ხელვაჩაურის მერიაში.
ახალი სოციალური სახლი სოფელ ორთაბათუმში, იმ ტერიტორიაზე უნდა დაპროექტდეს, სადაც უკვე აშენებულია 7-სართულიანი სოციალური სახლი. ახალი შენობის სართულების რაოდენობა არ უნდა აღემატებოდეს 9 სართულს, სიმაღლე კი – 30 მეტრს.
საკონკურსო პირობის მიხედვით, დასაპროექტებელი მრავალბინიანი საცხოვრებელი სახლი უნდა მოიცავდეს მინიმუმ 82 ბინას, მათ შორის:
21 ოროთახიანი – თითოეული ბინის ფართობი 50 კვ.მ-დან – 55 კვ.მ-მდე;
45 სამოთახიანი – თითოეულის საერთო ფართობი 70 კვ.მ-დან – 75 კვ.მ-მდე;
16 ოთხოთახიანი – თითოეულის საერთო ფართობით 90 კვ.მ-დან – 95 კვ.მ-მდე.
ახალი სახლის პროექტი და ხარჯთაღრიცხვა კონკურსში გამარჯვებულმა ხელშეკრულების გაფორმებიდან 160 დღეში უნდა მოამზადოს. კონკურსში წინადადებების მიღება კი 2022 წლის 21 აპრილს დაიწყება და ხუთ დღეში, 26 აპრილს დასრულდება.
ტერიტორია ორთაბათუმში [წითლად] სადაც ახალი სოციალური სახლი უნდა დაპროექტდეს
პროექტის ავტორმა, აღნიშნულ ტერიტორიაზე შენობის განთავსების შემდეგ, აუცილებლად უნდა შეათანხმოს დამკვეთს ეზოს კეთილმოწყობის დეტალური პროექტი (3D ვიზუალიზაციით), სადაც უნდა მოეწყოს პარკინგი და სარეკრეაციო ტერიტორია
