ბათუმის №79 საარჩევნო უბანზე „ერთიანი ნაციონალური მოძრაობის“ წარმომადგენელს, ლილი ლიპარტელიანს აცვია მაისური, რომელზეც ენმ-ის გარდაცვლილი წევრის, ნუგზარ ფუტკარაძის ფოტოა გამოსახული.
ნუგზარ ფუტკარაძემ №4 საარჩევნო ოლქში 2 ოქტომბრის არჩევნები მოიგო, იგი საკრებულოს უკვე არჩეული წევრი იყო, როცა გარდაიცვალა. „ერთიანი ნაციონალური მოძრაობა“ მის გარდაცვალებაში „ქართულ ოცნებას“ ადანაშაულებს და აცხადებს, რომ ნუგზარ ფუტკარაძე სამთავრობო პარტიის ზეწოლის მსხვერპლი გახდა. დღეს მიმდინარე არჩევნებში „ერთიანი ნაციონალური მოძრაობის“ კანდიდატი ნუგზარ ფუტკარაძის შვილი, მათე ფუტკარაძეა.
„დღეს საარჩევნო უბანზე გამოვცხადდი ქართული ოცნების მსხვერპლის, ნუგზარ ფუტკარაძის მაისურით. წინასწარ გავიარე კონსულტაციები იურისტებთან, ეს არ არის არანაირი დარღვევა, მასურს არ აწერია არც პარტიული ნომერი, არც სააგიტაციო მასალაა.
სამართლებრივი დარღვევა ეს არ არის, მორალური მხარე კი მე კი არა, „ქართულმა ოცნებამ“ უნდა იგრძნოს, რადგან ადამიანი, რომელმაც პირველივე ტურში გაიმარჯვა, ზარებით, ზეწოლებით იმსხვერპლა ქართულმა ოცნებამ“ – უთხრა „ბათუმელებს“ ლილი ლიპარტელიანმა.
მაისურის გამო ბათუმის №79 საარჩევნო უბანზე 5 საჩივარი დაიწერა. საარჩევნო კომისიის მდივანმა, თამარ დიასამიძე გვითხრა, რომ აღნიშნულზე ლილი ლიპარტელიანს შენიშვნაც მისცეს.
შეიძლება თუ არა ეს შემთხვევა განხილული იყოს დარღვევად?
ახალგაზრდა იურისტთა ასოციაცია, მიიჩნევს, რომ ეს დარღვევაა და ორგანიზაციამ აღნიშნულის შესახებ საჩივარიც დაწერა. „ჩვენი შეფასებით ეს დარღვევაა“ – ამბობენ საიაში.
დარღვევად მიიჩნევს ამას „სამართლიანი არჩევნებიც“.
„როგორც სადამკვირვებლო ორგანიზაცია, ვფიქრობთ, რომ კანონის სულისკვეთებით უნდა წავიკითხოთ და მისი ფართო განმარტებით, ფართო განმარტებით კი აგიტაცია არის რომელიმე პოლიტიკური პარტიის ან კანდიდატის მხარდასაჭერად ან მის წინააღმდეგ განხორციელებული ქმედება.
შესაბამისად, ეს მაისური, რომელზეც გამოსახულია გარდაცვლილი კანდიდატი, კონკრეტული პარტიის მხარდასაჭერად უნდა ჩავთვალოთ. ვფიქრობთ, ეს არის აგიტაცია, რაც უბანზე აკრძალულია.
თუ ვიწყო გაგებით წავალთ, შეიძლება პარტიულ სიმბოლიკად და ნიშნად ვერ ჩავთვალოთ, თუმცა ახლა კანდიდატის გვარი იგივეა [დღეს არჩევნებში კანდიდატია ნუგზარ ფუტკარაძის შვილი, მათე ფუტკარაძე], ამიტომ ჩვენ ვფიქრობთ, რომ ეს ნამდვილად წარმოადგენს აგიტაციას, რაც უბანზე აკრძალულია“ – გვითხრა „სამართლიანი არჩევნების“ აღმასრულებელმა დირექტორმა, ნინო დოლიძემ.
______________
დღეს, 2 აპრილს, ბათუმის 14 საარჩევნო უბანზე საკრებულოს მაჟორიტარ დეპუტატს ირჩევენ.
არჩევნებში 2 კანდიდატი მონაწილეობს, მათე ფუტკარაძე – „ერთიანი ნაციონალური მოძრაობა“ და რამაზ ჯინჭარაძე – „ქართული ოცნება“.
