შანხაიში 20 ათასზე მეტი ბანკირი, აქციებით მოვაჭრე და სააქციო ბირჟაზე დასაქმებული სხვა თანამშრომელი, ლოკდაუნის დასრულებამდე ოფისებში იცხოვრებს. ამის შესახებ ინფორმაციას „როიტერსი“ ადგილობრივ ოფიციალურ პირებზე დაყრდნობით ავრცელებს.
„ჩინეთის ვოლსტრიტი,“ – ასე მოიხსენიებენ შანხაიში მდებარე ფინანსური კომპანიების ცენტრს, „პუდონგის ლუჯიაძუის ფინანსურ ქალაქს“ (Pudong’s Lujiazui Financial City). აქ მდებარე თაუერებში განთავსებულია საბროკერო, აქტივების მენეჯმენტისა და სხვა ფინანსური 285 ოფისი. როგორც „როიტერსი“ იტყობინება, ლიჯიაძუის კომპანიებმა სასწრაფოდ გამოიძახეს პერსონალი სამსახურში და ოფისებში მოუმარაგეს საკვები, საძილე ტომრები და საჭირო ინვენტარი, რათა ორშაბათს, 28 მარტს, ლოკდაუნის გამოცხადების შემდეგ, ოფისებს შეუფერხებლად გაეგრძელებინათ მუშაობა.
შანხაიში, სადაც 26 მილიონი ადამიანი ცხოვრობს, ორშაბათს დაიწყო ლოკდაუნი. ლოკდაუნი ორ ნაწილად გამოცხადდა – 28 მარტიდან ქალაქის ერთი ნაწილი დაიკეტა, კვირის ბოლოდან კი – მეორე. ლოკდაუნის მიზანი მოსახლეობის კოვიდზე სრული დატესტვაა, რათა შეაჩერონ ეპიდაფეთქება.
შანხაიში განთავსებულია ჩინეთის უდიდესი ბაზრები აქციების, ობლიგაციების, სავალუტო და წარმოებული ვაჭრობისთვის.
