ნეტგაზეთი • RU

ენმ სასამართლოში ჯინჭარაძის კანდიდატურის მოხსნას ითხოვს – „ამომრჩევლის მოსყიდვა დადასტურდა“

„ერთიანი ნაციონალური მოძრაობა“ სასამართლოში 2 აპრილის შუალედურ არჩევნებზე რამაზ ჯინჭარაძის კანდიდატურის მოხსნას ითხოვს. რამაზ ჯინჭარაძე „ქართული ოცნების“ კანდიდატია ბათუმის მე-4 მაჟორიტარულ ოლქში, სადაც 2 აპრილს შუალედური არჩევნები გაიმართება.

„ამომრჩევლის მოსყიდვა დასტურდება, ჩვენ სასამართლოში დავუდასტურებთ, რომ ადამიანების მასობრივი გადმოწერა ამ ოლქში უკავშირდება მოსყიდვას, ეს გამოჩნდა „ტვ პირველის“ მასალითაც, როცა ადამიანები ჰყვებიან, რომ ბინის მიღების სანაცვლოდ გააკეთეს ჩაწერა ბათუმში,“ – ამბობს მირდატ ქამადაძე, „ერთიანი ნაციონალური მოძრაობის“ ერთ-ერთი ლიდერი ბათუმში.

გუშინ, 28 მარტს, „ნაციონალურ მოძრაობაში“ განაცხადეს, რომ 1053 ახალი ამომრჩეველი #4 მაჟორიტარულ ოლქში 16 მარტს დარეგისტრირდა, მათ შორის, 400-ზე მეტი ამომრჩეველი „ოცნების ქალაქის“ მიმდებარე ტერიტორიაზე, ფრიდონ ხალვაშის 188-ში ჩაეწერა და ხმას 89-ე საარჩევნო უბანზე მისცემს.

მირდატ ქამადაძე ყურადღებას ამახვილებს იმაზე, რომ სასამართლოს ამ შემთხვევაში შეუძლია 48 საათის განმავლობაში მოახდინოს რეაგირება და რამაზ ჯინჭარაძეს კანდიდატის რეგისტრაცია გაუუქმდეს.

გარდა ამისა, მოსყიდვა სისხლის სამართლის დანაშაულია, რაზეც გამოძიება უნდა დაიწყოს.

„მოსყიდვა დასტურდება იმ ვიდეოთიც, რომელიც თავად რამაზ ჯინჭარაძემ გაავრცელა, როცა „ოცნების ქალაქში“ მივიდა თორნიკე რიჟვაძესთან ერთად და უთხრა ადამიანებს, ამ ბინებს რამაზ ჯინჭარაძე გადმოგცემთ თქვენო… ეს ფაქტები ნათლად აჩვენებს ამომრჩევლის მოსყიდვას. სასამართლოს მოლოდინი არ გვაქვს, მაგრამ ვეცდებით, რომ ეს ავხსნათ,“ – გვითხრა მირდატ ქამადაძემ.

სარჩელით ენმ ბათუმის საქალაქო სასამართლოს დღეს, 29 მარტს, მიმართავს.

——————-

ბათუმის საკრებულოს წევრს შუალედურ არჩევნებზე, 2 აპრილს, მხოლოდ ბათუმის №4 მაჟორიტარულ ოლქში აირჩევენ, რადგან გასული წლის ოქტომბერში ამ ოლქში არჩეული ნუგზარ ფუტკარაძე 2021 წლის 18 ნოემბერს გარდაიცვალა. 24 ნოემბერს კი „ერთიანმა ნაციონალურმა მოძრაობამ“ გაავრცელა აუდიოჩანაწერი, რაც, პარტიის მტკიცებით, ადასტურებს იმას, რომ ნუგზარ ფუტკარაძის მოსყიდვას ცდილობდნენ 100 ათასი დოლარის სანაცვლოდ. თანხმობის შემთხვევაში ოპოზიცია უმრავლესობას საკრებულოში დაკარგავდა.

მიუხედავად იმისა, რომ არჩევნები 2021 წლის ოქტომბერში ჩატარდა, ამ დრომდე ბათუმში საკრებულო არ მუშაობს – საკრებულო ვერ ირჩევს თავმჯდომარეს და სხვა თანამდებობის პირებს. საკრებულოში ძალთა ბალანსი ახლა ასეა: 17 – 17 და ასეა მას შემდეგ, როცა გახარიას პარტიიდან საკრებულოში შესულმა წევრმა ირაკლი თავდგირიძემ კი თქვა, რომ ის „ნაციონალურ მოძრაობას“ მხარს არ დაუჭერს და დამოუკიდებელი დეპუტატი გახდა.

„ნაციონალურმა მოძრაობამ“ ბათუმის №4 მაჟორიტარულ ოლქში შუალედურ არჩევნებზე ბათუმის საკრებულოს წევრობის კანდიდატად ნუგზარ ფუტკარაძის შვილი, მათე ფუტკარაძე. მისი კონკურენტი „ქართული ოცნებიდან“ რამაზ ჯინჭარაძეა.

მთავარი ფოტო: რამაზ ჯინჭარაძე თორნიკე რიჟვაძესთან ერთად „ოცნების ქალაქში“. სქრინი რამაზ ჯინჭარაძის ფეისბუქგვერდზე გამოქვეყნებული ვიდეოდან

ნეტგაზეთის მასალების სხვა გამოცემებში გადაბეჭდვის წესი
ავტორი