იქნება თუ არა ბათუმის მერიის მიდგომა ერთიანი ავარიულ სახლებთან დაკავშირებული გადაწყვეტილებების მიღებისას ქალაქის ცენტრსა და გარეუბნებში? – ეს არის მთავარი საკითხი, რაც ახლა ავარიულ სახლებში მცხოვრებლებს აწუხებთ.
მოქალაქე, რომელიც „ბათუმელებს“ დაუკავშირდა, ამბობს, რომ ქალაქის ცენტრში ავარიულ სახლებში მცხოვრებთათვის მერიას კონკრეტული შეთავაზება აქვს, გარეუბნებში კი წინადადების დაზუსტებისგან თავს იკავებს.
„ჩვენთან მოვიდა მერიის წარმომადგენელი და გვითხრა, ხელი მოაწერეთ თანხმობას, ან პროგრამაში მონაწილეობას ვერ მიიღებთო. ძალიან უხეშად გველაპარაკა, თითქოს ჩვენი უფროსი იყოს. მერს რომ შევხვდით, კარგად დაგველაპარაკა, დაგვაიმედა, მაგრამ უბნის წარმომადგენელი ცდილობს შეგვაშინოს. იმ წერილის მიხედვით, რაც მერიამ გამოგვიგზავნა, ვერ გავიგეთ რას გვთავაზობენ.
ჩემი ახლობელიც ავარიულ სახლში ცხოვრობს, წავედი და მათი წერილიც ვნახე. მერია მათ იმავე ადგილზე ახალი სახლის მშენებლობას ან სხვა ბინაში გადაყვანას სთავაზობს, ჩვენს წერილში ეს არ წერია, ამიტომ ვერ მივხვდით, რას გვთავაზობენ, ვერც ამხანაგობის თავმჯდომარემ გაგვარკვია“, – გვიყვება მოქალაქე, რომელსაც სახელისა და გვარის დასახელება არ სურს.
„არ მინდა კიდევ პრობლემები, ჯერ დაველოდები“, – გვითხრა მან.
მსგავსი შინაარსის წერილი, რომელზეც მოქალაქე გვიყვება, ბათუმში ავარიულ სახლებში მცხოვრებლებმა არაერთ მისამართზე მიიღეს. შეთავაზება მერიისგან იდენტურია, თუმცა რამდენიმე შემთხვევაში გაურკვევლობა მართლაც არის. არადა, ექსპერტიზის დასკვნები [რომელთა შესწავლა ჩვენ შევძელით] თითქმის იდენტურია და ყველა მათგანი ვიზუალურ დათვალიერებას ეყრდნობა.
ბათუმის ერთ-ერთ ცენტრალურ – 9 მარტის ქუჩაზე, #3-ში ოფიციალური წერილი ბათუმის მერიისგან 2021 წლის 14 თებერვალს მიიღეს. ამ წერილით მერია მოსახლეობას ატყობინებს, რომ მათი საცხოვრებელი ავარიულია და საფრთხეს უქმნის ადამიანის ჯანმრთელობასა და სიცოცხლეს.
ამავე წერილში მერია მოქალაქეებს განუმარტავს, რომ ასეთ შემთხვევაში უფლებამოსილია დემონტაჟი თანხმობის გარეშეც დაიწყოს, თუმცა კანონი ასევე ავალდებულებს, რომ მესაკუთრეს ტოლფასი ქონება ან სამართლიანი კომპენსაცია შესთავაზოს. ასევე, თუ იმავე ადგილას, იმავე ფუნქციის ახალი შენობა აშენდება, ამ შენობაში გადასცეს სულ მცირე იმ ზომის ფართობი, რომელიც მის საკუთრებაში იყო ძველ შენობაში.
ყოველივე ამის გათვალისწინებით, მერია 9 მარტის ქუჩაზე, #3-ში მდებარე სახლის მესაკუთრეებს სწერს:
„ბათუმის მუნიციპალიტეტი თქვენი თანხმობის შემთხვევაში მზად არის მიზნობრივი პროგრამის ფარგლებში, თქვენს საკუთრებაში რეგისტრირებული ავარიული საცხოვრებელი ფართის სანაცვლოდ საკუთრებაში გადმოგცეთ იგივე ოდენობის გარემონტებული საცხოვრებელი ბინა ქალაქის ფარგლებში სხვა ტერიტორიაზე. ასვე, მუნიციპალიტეტის მერია თქვენი თანხმობის შემთხვევაში მზად არის მიზნობრივი პროგრამის ფარგლებში განახორციელოს თქვენს საკუთრებაში არსებული შენობის დემონტაჟი, სანაცვლოდ არსებულ ადგილზე კანონმდებლობით განსაზღვრული იგივე ფუნქციის შენობის მშენებლობა და აღნიშნულ ახალ შენობაში, იგივე ოდენობის გარემონტებული საცხოვრებელი ბინის გადმოცემა.“
წერილის მიხედვით, ამ პროექტის განსახორციელებლად საჭიროა ბინათმესაკუთრეთა ყველა წევრის თანხმობა, წინააღმდეგ შემთხვევაში, სახლს ავარიული სახლის პროგრამაში ვერ ჩართავენ. ამხანაგობების თავმჯდომარეები კი ამბობენ, რომ ეს რთული მისაღწევია.
აქ მცხოვრებლებს შეთავაზება მოსწონთ.
„მისასალმებელია, რომ ეს პროგრამა გაკეთდა, ბოლოს და ბოლოს მივიდნენ იმ დასკვნამდე, რომ ადამიანი შეიძლება დაიღუპოს აქ. ჩვენ გვინდა, რომ სახლი აქ აშენდეს. აქ ვცხოვრობ და არ წავალ, სადღაც შორს თუ მომცემ, შეიძლება ვიღაც წავიდეს. აქ ინვესტორიც არის მოსული. მერიამ გვითხრა, თქვენ ეს პროგრამა ხელს არ შეგიშლითო. საქმე იმაშია, რომ აქ ინვესტორი ათსართულიანის მშენებლობის პირობას არ თანხმდება, რადგან ამ სახლს 35 მესაკუთრე ჰყავს, რომელიც უნდა დააკმაყოფილოს, ამიტომ 12-სართულიანი მაინც უნდა ააშენოს“,- გვიყვება ამხანაგობის თავმჯდომარე თინათინ გიორგაძე.
ავარიული სახლი 9 მარტის ქუჩაზე
ავარიული სახლის ერთი ნაწილი გარემონტებული და გამაგრებულია, მეორე ნაწილიდან კი მერიას ოჯახები ქირით ჰყავს გაყვანილი
ასევე ქალაქის ერთ-ერთ ცენტრალურ ქუჩაზე, ბარათაშვილის 49-შიც, ანალოგიური წერილი მიიღეს.
თუმცა მერიისგან აბსოლუტურად განსხვავებული შინაარსის წერილი მიიღეს ავარიული სახლის მცხოვრებლებმა ქალაქის ცენტრიდან შედარებით მოშორებით, გიორგი ბრწყინვალის #48-ში:
ამ შემთხვევაში წერილს ხელს აწერს არა ბათუმის მერი არჩილ ჩიქოვანი, არამედ ბათუმის მერიის საქალაქო ინფრასტრუქტურისა და კეთილმოწყობის სამმართველოს ხელმძღვანელი აკაკი ბერიძე.
„გვითხრეს, ჯერ ექსპერტიზის პასუხი არ გვაქვს, როგორც კი პასუხს მივიღებთ, შემდეგ გადაწყდებაო“, – გვიყვება ამხანაგობის თავმჯდომარე მერაბ ყადიძე.
„ბათუმელების“ ინფორმაციით, გიორგი ბრწყინვალის #48-ში მდებარე სახლის ექსპერტიზის დასკვნა მერიის არქივში ინახება. ამ და კიდევ 34 სახლის ექსპერტის დასკვნის მოსამზადებლად მერიამ ბიუჯეტიდან თანხა 2019 წელს დახარჯა და შესაბამისი ინფორმაცია ბათუმის საკრებულოშიც ჰქონდა წარდგენილი.
დოკუმენტებში, რომლებიც მერიამ ბათუმის საკრებულოს 2019 წელს გადაუგზავნა, ვკითხულობთ:
გ. ბრწყინვალის ქ. #48 – საცხოვრებელი სახლი ავარიულია და საფრთხისშემცველია. დაზიანებათა დიდი მოცულობიდან და შენობის კონსტრუქციული სქემიდან გამომდინარე, შენობის აღდგენა არარენტაბელურობის გამო არ მიგვაჩნია მიზანშეწონილად. ოჯახების რაოდენობა – 25.
გიორგი ბრწყინვალის #48
მერიისგან წერილი მიიღეს ქალაქსშემოერთებულ ტერიტორიაზე ავარიულ სახლში მცხოვრებლებმაც, სადაც მერია წერს, რომ სახლი ავარიულია და თანხმობის შემთხვევაში „შესაბამის ღონისძიებებს განახორციელებენ“. თუმცა ეს შესაბამისი ღონისძიებები წერილში დაკონკრეტებული არ არის. ექსპერტიზის დასკვნის მიხედვით, დაზიანებულია სახლის მზიდი კედლები. გარდა ამისა, გასულია სახლის ექსპლუატაციის ვადა და მისი საცხოვრებლად გამოყენება სახიფათოა.
9 მარტის ქუჩაზე მდებარე ავარიული სახლის სადარბაზო
