კიევი დღეს | ფოტო - Batumelebi • რუსეთ-უკრაინის ომი, ფოტოამბავი, • batumelebi.ge

23 დღეა უკრაინა თავს იცავს რუსეთის შეიარაღებული ძალებისგან. დაბომბილია უკრაინის ქალაქები და სოფლები, მათ შორის ქვეყნის დედაქალაქი, კიევი.

ჯერ კიდევ ერთი თვის წინ კიეველები მშვიდად ცხოვრობდნენ, დადიოდნენ სამსახურში, სკოლაში, სეირნობდნენ ქუჩაში… სულ რაღაც ერთი თვის წინ ძნელი წარმოსადგენი იყო, რომ მალე ქალაქში განგაშის სიგნალი მათ ბუნკერებსა და სარდაფებში დამალვისკენ მოუწოდებდა და კიევს რუსეთი დაბომბავდა.

18 მარტს, დილით კიევის პოდოლსკის რაიონში, ქალაქის ჩრდილო-დასავლეთით, სამხედრო რაკეტის ნარჩენები დაეცა. დაიღუპა ერთი და დაშავდა 19 ადამიანი. დაინგრა რამდენიმე სახლი და სკოლა.

ომის დაწყებიდან, 24 თებერვლიდან დღემდე კიევში, ქალაქის მერიის მონაცემებით, 222 ადამიანი დაიღუპა. 60 მშვიდობიანი მოქალაქე იყო, მათ შორის – 4 ბავშვი.