რუსეთი ამერიკის შეერთებულ შტატებს აფრთხილებს, რომ მოსკოვს აქვს ძალა, მსოფლიოს აღიარებულ სუპერსახელმწიფოს „ადგილი მიუჩინოს“ და დასავლეთს რუსეთის გასანადგურებლად ველური რუსოფობიის შეთქმულების გაჩაღებაში ადანაშაულებს. ამის შესახებ Reuters-ი წერს.
გამოცემის ცნობით, განცხადებები 17 მარტს, რუსეთის უშიშროების საბჭოს თავმჯდომარის მოადგილემ, დიმიტრი მედვედევმა გააკეთა.
მედვედევის განცხადებით, აშშ-მ რუსეთის დასაჩოქებლად „საზიზღარი“ რუსოფობია გააჩაღა.
„ეს არ იმუშავებს – რუსეთს აქვს ძალა ყველა თავხედ მტერს თავისი ადგილი მიუჩინოს,“ – თქვა დიმიტრი მედვედევმა, რომელიც 2008-2012 წელს რუსეთის პრეზიდენტის პოსტს იკავებდა.
მას შემდეგ, რაც 24 თებერვალს რუსეთი უკრაინას თავს დაესხა, აშშ-მ, ევროკავშირმა და პარტნიორმა ქვეყნებმა სანქციების არაერთი პაკეტი დაუწესა რუსეთს – როგორც სახელმწიფო ინსტიტუტებსა და კომერციულ ორგანიზაციებს, ასევე, ფიზიკურ პირებს, მათ შორის, რუსეთის პრეზიდენტს ვლადიმერ პუტინსა და ყოფილ პრეზიდენტს დიმიტრი მედვედევს.
უკრაინის მხარდაჭერის ნიშნად რუსული ბაზარი დატოვეს მსხვილმა საერთაშორისო კომპანიებმაც.
ვლადიმერ პუტინს ომის დამნაშავე უწოდეს აშშ-ის პრეზიდენტმა ჯო ბაიდენმა და გაერთიანებული სამეფოს საგარეო საქმეთა მინისტრმა ლიზ ტრასმა.
