ნეტგაზეთი • RU

რა პრობლემები შექმნა მარტის დიდთოვლობამ მაღალმთიან აჭარაში

დღეს, 17 მარტს, მაღალმთიანი აჭარის სამივე მუნიციპალიტეტში –  ქედაში, შუახევსა და  ხულოში დილიდან ინტენსიურად თოვს.

თოვლის საფარის სიმაღლე ხულოს მუნიციპალიტეტის მაღალი ზონის სოფლებში 1 მეტრს აჭარბებს.

ხულოს მერიის პრესსამსახურის ინფორმაციით, მუნიციპალიტეტის ადმინისტრაციულ ერთეულებთან დამაკავშირებელ გზებზე შეფერხება არ არის და გადაადგილება მაღალი გამავლობის ავტომობილებით შესაძლებელია.

გზაზე გადაადგილება და ელექტროენერგიის მიწოდება შეფერხებულია ხულოს მუნიციპალიტეტის გარკვეულ სოფლებში.

„დიოკნისისა და რიყეთის თემის გარკვეულ სოფლებს არ მიეწოდება ელექტროენერგია.

თოვლის საფარის სიმაღლე ხულოს მაღალი ზონის სოფლებში უკვე 1 მეტრს აჭარბებს, ხოლო დაბაში 30-40 სანტიმეტრია. გადაადგილება ადმინისტრაციულ ცენტრებთან დამაკავშირებელ გზებზე მაღალი გამავლობის ავტომობილებისთვის არ შეფერხებულა. მუნიციპალიტეტის შიდა სასოფლო გზებზე ნაწილობრივ  გადაადგილება შესაძლებელია, ნაწილობრივ – არა.

საგზაო დეპარტამენტის ინფორმაციით, გზებზე 12 ერთეული ტექნიკა მუშაობს“, – გვითხრეს ხულოს მუნიციპალიტეტის პრესსამსახურში.

შუახევის მუნიციპალიტეტის მაღალი ზონის სოფლებში თოვლის საფარი 70 სანტიმეტრამდეა, დაბაში კი –  20-30 სანტიმეტრი.

„მაღალი გამავლობის ავტომობილების გადაადგილება შეუფერხებლადაა შესაძლებელი შუახევის სოფლების ნაწილში, ზოგიერთ სოფელში გზა იწმინდება.

დილის საათებში ელექტროენერგია 2 სოფელს არ მიეწოდებოდა, აღდგა, შემდეგ ისევ გაითიშა“, –  გვითხრეს შუახევის მერიის პრესსამსახურში.

ქედის მერიის პრესსამსახურის ინფორმაციით, მუნიციპალიტეტის მაღალ ზონაში თოვლის საფარი 70 სანტიმეტრია, ხოლო დაბლობში – 10-15 სანტიმეტრი.

ქედის მერიაში ამბობენ, რომ ქედის ცენტრალურ გზაზე მაღალი გამავლობის ავტომობილები შეუფერხებლად მოძრაობენ. ინტენსიურად წმენდენ გზას.

„ენერგო-პრო ჯორჯიას“ ინფორმაციით, ბოლო მონაცემებით ელექტროენერგია არ მიეწოდება: „ქედის მუნიციპალიტეტში – სოფელ ტაკიძეებს, შუახევის მუნიციპალიტეტში – უჩამბის ადმინისტრაციული ერთეულის რამდენიმე სოფელს, ასევე, ნიგაზეულსა და ფურტიოს; ხოლო ხულოს მუნიციპალიტეტში – დიოკნისის ადმინისტრაციულ ერთეულში შემავალი სოფლების ნაწილს“.

_____________

ფოტოზე: სოფელი თხილვანა, 17 მარტი. სოფელში თოვლის საფარის სიმაღლე 1 მეტრზე მეტია. თემურ ქამადაძის ფოტო

ნეტგაზეთის მასალების სხვა გამოცემებში გადაბეჭდვის წესი
ავტორი