მთავარი,სიახლეები

ეკლესია უნდა იყენებდეს იესოს ენას და არა პოლიტიკის – რომის პაპი რუსეთის პატრიარქს

17.03.2022 • 1534
ეკლესია უნდა იყენებდეს იესოს ენას და არა პოლიტიკის – რომის პაპი რუსეთის პატრიარქს

რომის პაპი ფრანცისკე უკრაინაში მიმდინარე ომის შესახებ რუსეთის პატრიარქ კირილს ვიდეოზარით ესაუბრა და უთხრა, რომ ეკლესიის ლიდერებმა უნდა გამოიყენონ იესოს ენა და არა – პოლიტიკის.

ვატიკანის ცნობით, საუბარი შეეხო „უკრაინის ომს და ქრისტიანებისა და მათი წინამძღვრების როლს მშვიდობის დამყარებაში“.

„ჩვენ ვართ იმავე წმინდა ხალხის მწყემსები, რომლებსაც სწამთ ღმერთის, სამების, ყოვლადწმინდა ღვთისმშობლის. ამიტომ ჩვენ უნდა გავერთიანდეთ მცდელობებში მშვიდობის დასამყარებლად, დაზარალებულთა დასახმარებლად, ვეძიოთ მშვიდობის გზები და შევაჩეროთ ცეცხლი“ – ამბობს რომის პაპი.

ეკლესია არა პოლიტიკის, არამედ იესოს ენას უნდა იყენებდეს – რომის პაპი ფრანცისკე.

„იყო დრო, როცა ადამიანები ჩვენს ეკლესიებშიც კი, ლაპარაკობდნენ წმინდა ომზე ან სამართლიან ომზე. დღეს ჩვენ ასე ვერ ვილაპარაკებთ. განვითარდა ქრისტიანული ცნობიერება მშვიდობის მნიშვნელობის შესახებ,“ – თქვა რუსეთის პატრიარქთან საუბრისას რომის პაპმა.

ეს გამოხმაურებაა პატრიარქ კირილის ქადაგებებზე, როცა ის ომის საშინელებაზე საუბრის პარალელურად სხვადასხვა მიზეზით რუსეთის თავდასხმის გამართლებას ცდილობს.

მაგალითად, 6 მარტს, როცა მართლმადიდებლები „შენდობის კვირას“ აღნიშნავდნენ, მან მოუწოდა მრევლს, რომ აპატიონ ყველა ცოდვა და წყენა ადამიანებს, მათ შორის, „იქ, სადაც ეს ძალიან რთულია; იქ, სადაც ადამიანები ეომებიან ერთმანეთს, მაგრამ პატიება სამართლიანობის გარეშე ეს არის კაპიტულაცია და სისუსტე, ამიტომ პატიებას თან უნდა ახლდეს სინათლის მხარეზე დგომის უფლების შეუცვლელად შენარჩუნება“.

მანამდე რუსეთის პატრიარქმა თქვა, რომ უკრაინაში დღევანდელი ვითარება იმის გამო შეიქმნა, რომ რვა წელია, გარკვეული ძალები ცდილობენ დონბასში არსებული საზოგადოებისა და მისი ღირებულებების განადგურებას. კირილეს თქმით, დონბასში ომი იმის გამოა, რომ იქ ხალხს გეიაღლუმის გამართვა არ სურს, გარე ძალები კი სწორედ ამ ტესტის ჩაბარებას ითხოვენ.

„იცით რა არის ეს ტესტი? ეს არის მარტივი და თან ამავდროულად საშინელი ტესტი – გეიაღლუმი. მოითხოვენ ხალხისგან, რომ გამართონ გეიაღლუმი“, – განაცხადა რუსეთის პატრიარქმა.

რომის პაპმა ფრანცისკემ ვიდეოზარის ბოლოს ომის ფასზე ისაუბრა:

„ომები ყოველთვის უსამართლოა, რადგან ხალხი იხდის მის ფასს. ჩვენს გულებს არ შეუძლია არ გამოიტირონ ომის ყველა მსხვერპლთან ერთად დაღუპული ბავშვები და ქალები. ომი არასოდეს არ არის გზა. სული, რომელიც გვაერთიანებს, გვთხოვს, როგორც მწყემსებს, დავეხმაროთ ხალხებს, რომლებიც იტანჯებიან ომით“.

ამავე საუბრის შესახებ ინფორმაცია გამოაქვეყნა რუსეთის მართლმადიდებლური ეკლესიის ვებგვერდმაც. იქ შეხვედრის მხოლოდ იმ ნაწილის შესახებ წერია, სადაც რომის პაპმა და რუსეთის პატრიარქმა ომში დაზარალებულებისთვის ჰუმანიტარულ დახმარებაზე ისაუბრეს. იქვე ვკითხულობთ რუსეთის საპატრიარქოს მანიპულაციურ ტექსტს: „მხარეებმა ხაზი გაუსვეს მიმდინარე მოლაპარაკებების პროცესის განსაკუთრებულ მნიშვნელობას და გამოთქვეს სამართლიანი მშვიდობის უსწრაფესი მიღწევის იმედი“.

საუბარი რომის პაპსა და კირილეს შორის ოთხშაბათს, 16 მარტს, შუადღეს შედგა.

რუსეთმა 24 თებერვალს, დილით, უკრაინაში სრულმასშტაბიანი ომი წამოიწყო, რომელიც დღემდე გრძელდება. უკრაინაში დღემდე იბომბება მშვიდობიანი მოსახლეობა.

გადაბეჭდვის წესი


ასევე: