დაიღუპა ორსული ქალი, რომელიც 9 მარტს მარიუპოლში ბავშვთა და სამშობიარო საავადმყოფოს დაბომბვისას დაშავდა. ორსული ქალის გარდაცვალების შესახებ ცნობას უკრაინის მთავრობა ავრცელებს. მათივე ცნობით, ვერც ბავშვის გადარჩენა მოხერხდა.
რუსეთის სამხედრო ძალებმა სამხრეთ უკრაინის ქალაქ მარიუპოლში ბავშვთა საავადმყოფო და სამშობიარო 9 მარტს დაბომბეს.
მეორე დღეს, 10 მარტს, უკრაინულმა მხარემ გაავრცელა ინფორმაცია, რომ მარიუპოლში სამშობიაროს დაბომბვის შედეგად დაიღუპა 3 ადამიანი, მათ შორის, ერთი ბავშვი და დაშავდა 17, მათ შორის, ფეხმძიმე ქალები.
ჯანდაცვის მსოფლიო ორგანიზაციის განცხადებით, უკრაინაში ომის დაწყების შემდეგ 18 სხვადასხვა თავდასხმა განხორციელდა ჯანდაცვის დაწესებულებებზე.
BBC-ის ცნობით, რუსეთი ირწმუნება, რომ უკრაინელმა მებრძოლებმა კლინიკებიდან გაიყვანეს პაციენტები და გაიტანეს აღჭურვილობა და საბრძოლო პოზიციები შექმნეს.
უკრაინის პრეზიდენტი, ვოლოდიმირ ზელენსკი კი აცხადებს, რომ რუსეთი ომის დანაშაულებს სჩადის.
