უკრაინის პრეზიდენტმა, ვოლოდიმირ ზელენსკიმ, ცოტა ხნის წინ ვიდეომიმართვისას პროპაგანდისტებზე ისაუბრა და თქვა, რომ საომარი დანაშაულები შეუძლებელი იქნებოდა პროპაგანდისტების მხრიდან ხელის დაფარების გარეშე.
ზელენსკიმ გაიხსენა, რომ გუშინ მარიუპოლის სამშობიარო და ბავშვთა საავადმყოფოს რუსმა სამხედროებმა ცეცხლი გაუხსნეს, რის შედეგადაც 17 ადამიანი (ქალი, ბავშვი, ექიმი) დაშავდა, სამი კი დაიღუპა (მათ შორის, ერთი ბავშვი, გოგონაა).
ზელენსკის თქმით, ამ თემაზე ისაუბრეს რუსულ ტელევიზიაშიც. „ეს თემა იყო მათ თოქ-შოუში, მაგრამ არც ერთი მართალი სიტყვა არ თქვეს, რუსები მოატყუეს, რომ თითქოს საავადმყოფოში არც ერთი პაციენტი არ იყო, სამშობიაროში კი – არც ქალი და არც ბავშვი. რუსები მოატყუეს, რომ თითქოს იქ დაბანაკებულები იყვნენ ნაციონალისტები… ისინი, როგორც ყოველთვის, დარწმუნებით იტყუებიან“, – თქვა უკრაინის პრეზიდენტმა.
„მინდა მათ ერთი რამ ვუთხრა: თქვენ პასუხს აგებთ ისევე, როგორც ყველა, ვინც მშვიდობიანი მოსახლეობის დაბომბვის ბრძანებას გასცემს. ჩვენ ვიპოვით პროპაგანდისტების და მათთან დაკავშირებულ პირთა მთელ ქონებას. ჩვენ ყველაფერს გავაკეთებთ, რომ ის ჩამოერთვას მათ ყველგან, სადაც არ უნდა იყოს. თქვენ ხომ გიყვართ მდიდრული ცხოვრება, აყვავებული ქვეყნები? თქვენ ეს აღარ გექნებათ და ეს მხოლოდ დასაწყისია”, – დასძინა მან.
ზელენსკის თქმით, პროპაგანდისტები აუცილებლად აგებენ პასუხს ომის დანაშაულში თანამონაწილეობისთვის.
„ეს აუცილებლად მოხდება, რუსეთის მოქალაქეებს შესძულდებით. ყველას, ვისაც ახლა ატყუებთ ყოველდღე და მრავალი წლის განმავლობაში. როდესაც ისინი იგრძნობენ თქვენი ტყუილის შედეგებს, იგრძნობენ საკუთარ საფულეებზე, შესაძლებლობებზე, რომლებიც სულ უფრო და უფრო მცირდება, იგრძნობენ რუსი ბავშვებისთვის მოპარული მომავლით“, – განაცხადა მან.
უკრაინის პრეზიდენტმა აღნიშნა, რომ ომი არასოდეს არის იზოლირებული, მაგრამ ყოველთვის ურტყამს მსხვერპლსაც და აგრესორსაც.
„აგრესორი, უბრალოდ, ამას მოგვიანებით ხვდება, მაგრამ ყოველთვის იტანჯება“, – თქვა მან.
