ნეტგაზეთი • RU

უკრაინის 300 მოქალაქე აჭარაში კერძო სექტორმა შეიფარა, 110 კი – სახელმწიფომ

უკრაინის მოქალაქეებს, რომლებიც საქართველოში ტურისტული ვიზიტით იმყოფებოდნენ, მაგრამ რუსეთ-უკრაინის ომის გამო ვეღარ ახერხებენ სამშობლოში დაბრუნებას, საქართველო შეიფარებს. საქართველო მზადაა უკრაინელი დევნილებიც მიიღოს, რომლებიც ყოველდღიურად რეკავენ ცხელ ხაზებზე.

აჭარის ტურიზმისა და კურორტების დეპარტამენტის ინფორმაციით, აჭარაში ამ დროისთვის უკრაინის 410 მოქალაქე იმყოფება. მათგან 110 ტურისტული მიზნით იყო შემოსული ქვეყანაში, 300-მდე ადამიანი კი უკრაინიდან ლტოლვილია.

აჭარის ტურიზმის დეპარტამენტის ხელმძღვანელის, თინათინ ზოიძის თქმით, შექმნილია ორი ცხელი ხაზი. აქედან ერთი მთელ საქართველოს ფარავს, მეორე – აჭარის რეგიონში ცალკე შეიქმნა და 24 საათი ფუნქციონირებს.

„ასევე ტურისტული საინფორმაციო ცენტრების მეშვეობით ხდება უკრაინის მოქალაქეებთან კოორდინირება.

შემუშავდა სახელმწიფო პროგრამა უკრაინის იმ მოქალაქეებისთვის, რომლებიც პირველი თებერვლიდან 23 თებერვლის ჩათვლით იმყოფებოდნენ საქართველოში და მათ საქართველო უზრუნველყოფს როგორც სასტუმრო მომსახურებით, ასევე კვებით, შეისწავლის მათ სამედიცინო საჭიროებებსაც და მერიასთან და ჯანდაცვის უწყებებთან ერთად მოხდება ამ საჭიროებების იდენტიფიცირება, აღრიცხვა და მოგვარება“, – ამბობს თინათინ ზოიძე.

საქართველოში ტურისტად მყოფ უკრაინის მოქალაქეებს, რომლებიც ომის გამო ვერ დაბრუნდნენ უკრაინაში, საქართველო შეიფარებს. ფოტო: აჭარის ტურიზმის დეპარტამენტი.

რაც შეეხება ლტოლვილებს, თინათინ ზოიძის თქმით, ომის შემდეგ დაახლოებით 300 ზარი შემოვიდა აჭარაში ცხელ ხაზზე.

„ამ ეტაპზე ლტოლვილების დაკმაყოფილება ხდება კერძო სექტორის ჩართულობით. როგორც საოჯახო ტიპის სახლები, ასევე მოხალისეები გამოთქვამენ მზაობას, რომ დაეხმარონ მათ და, შესაბამისად, ამ სექტორში ხდება მათი განთავსება.

პროცესში ჩართულია უკრაინის საელჩო საქართველოში, საიმიგრაციო სამსახური და სხვა სახელმწიფო უწყებები. მუშავდება პროგრამა, რომ მათი საჭიროებების ნაწილიც იყოს დაფარული“, – ამბობს თინათინ ზოიძე.

23 თებერვალს რუსეთმა სრულმასშტაბიანი ომი დაიწყო უკრაინის წინააღმდეგ, იბომბება უკრაინის დედაქალაქი და კიდევ რამდენიმე ქალაქი. რუსი სამხედროები ესვრიან მშვიდობიან მოქალაქეებს და საცხოვრებელ პუნქტებს.

ამ დროისთვის უკრაინას 2 მილიონამდე ლტოლვილი ჰყავს. ისინი ძირითადად აღმოსავლეთ ევროპის ქვეყნებში გადადიან,ზოგიერთი საქართველოშიც ჩამოდის.

_______________

ფოტოზე: უკრაინელი ლტოლვილები პოლონეთის საზღვარზე. ფოტო: EPA-EFE/Vitaliy Hrabar

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com