ნეტგაზეთი • RU

ზახაროვამ კიევისა და თბილისის ბიოლოგიურ ლაბორატორიებზე ისაუბრა და აშშ დაადანაშაულა

რუსეთის საგარეო საქმეთა სამინისტროს პრესსპიკერმა, მარია ზახაროვამ უკრაინა და აშშ ბიოლოგიური იარაღის შემუშავებასა და ფლობაში დაადანაშაულა და აშშ-სგან საჯარო განმარტებები მოითხოვა. მისი თქმით, რუსეთი ითხოვს შეერთებული შტატებისგან უკრაინის ბიოლოგიურ ლაბორატორიებში განხორციელებული საქმიანობის დეტალებს.

ზახაროვამ იქვე დასძინა, რომ ბიოლოგიური იარაღის კონვენციის საწინააღმდეგო სამხედრო ბიოლოგიური მოქმედებების თავიდან ასაცილებლად საჭიროა გარკვეული ზომების მიღება, მათ შორის, კონვენციის მე-5 და მე-6 მუხლების გამოყენება, რომლებიც ძირითადად კონვენციის ხელმომწერთა შორის კონსულტაციებსა და გაეროს უშიშროების საბჭოსთან ამ კონვენციის სხვა წევრების მიერ შეტანილი საჩივრების შესახებ გამოძიებაში თანამშრომლობას გულისხმობს.

„ამ დღეებში დადასტურდა ჩვენი დიდი ხნის შიში, რომელიც არაერთხელ გაგვიჟღერებია სხვა წლებშიც, აშშ-ის შესაბამისი სპეცსამსახურების ეგიდით, უკრაინის ტერიტორიაზე სამხედრო ბიოლოგიური მასალების შემუშავებასთან დაკავშირებით“, – თქვა ზახაროვამ. – „ეს დადასტურდა არა მხოლოდ იმ მასალებისა და მონაცემების საფუძველზე, რომლებიც ოპერატიულად იქნა მოპოვებული უკრაინის ტერიტორიაზე, არა მხოლოდ უკრაინის შესაბამისი დეპარტამენტების განცხადებებიდან, ეს ასევე პირდაპირ დადასტურდა აშშ-ის სახელმწიფო მდივნის მოადგილის ვიქტორია ნულანდის გამოსვლით.

“ჩვენ 2020 წელსაც გამოვთქვამდით შეშფოთებას აშშ-ის სამხედრო-ბიოლოგიური აქტივობის შესახებ პოსტსაბჭოთა სივრცეში. ჩამოვთვლი, რა რაოდენობის განცხადებებს და მასალებს ვავრცელებდით ბიოლაბორატორიების შესახებ, პოსტსაბჭოთა ქვეყნების ტერიტორიაზე, მაგალითად, საქართველოში. უამრავი კითხვა ეხებოდა აშშ-ის თავდაცვის სამინისტროს ბაზაზე, საზოგადოებრივი ჯანდაცვის ცენტრის, ლუგარის სახელობის კვლევითი ცენტრის საქმიანობას. საუბარია უშუალოდ საქართველოზე. იქ ხდებოდა აშშ-საქართველოს ქვეითი ჯარების სამედიცინო გამოკვლევების მართვა…”

ზახაროვა ირწმუნება, რომ 24 თებერვალს განადგურდა განსაკუთრებით საშიში პათოგენები, რათა არ გამჟღავნებულიყო უკრაინისა და შეერთებული შტატების მიერ ბიოლოგიური და ტოქსიკური იარაღის აკრძალვის კონვენციის დარღვევის ფაქტები.

“ჩვენ ვადასტურებთ უკრაინაში სპეციალური ოპერაციის ჩატარებისას გახსნილ ფაქტებს, რომლებიც მოწმობენ სამხედრო ბიოლოგიური პროგრამის კვალის სასწრაფო წმენდაზე. ისინი რეალიზდებოდა კიევის მიერ აშშ-ს დაფინანსებით. არანაირ მშვიდობიან გამოყენებაზე, სამეცნიერო და განვითარების მიზნებზე, რა თქმა უნდა, საუბარი არ არის. საქმე ის არის, რომ ისინი ფინანსდებოდნენ აშშ-ის თავდაცვის სამინისტროს ხაზით.

უკრაინის ბიოლაბორატორიების თანამშრომლებისგან მიღებულია დოკუმენტაცია, 24 თებერვალს განსაკუთრებულად საშიში, ჭირის, ციმბირის წყლულის, ქოლერის და სხვა მომაკვდინებელი დაავადებების პათოგენების სასწრაფოდ განადგურების შესახებ. მინდა ხაზი გავუსვა, რომ ამ ყველაფერს აქვს დოკუმენტური დადასტურება. უფრო მეტიც, ამის შესახებ გაფრთხილებდით ბევრი წელი… კერძოდ, საუბარია უკრაინის ჯანდაცვის სამინისტროს განკარგულებაზე საშიში პათოგენების შენახული მარაგების ოპერატიული ლიკვიდაციის შესახებ, რომელიც გაიგზავნა ყველა ბიოლაბორატორიაში…” – თქვა მან.

იქიდან გამომდინარე, რომ ამ მტკიცებულებების გაქარწყლება უკვე არაფრით შეიძლება, ჩვენ ვითხოვთ დეტალებს. მსოფლიომ უნდა იცოდეს რის გაკეთებას აპირებდით იქ, რა მიზნით, რა ვადებში, რა იყო  ე.წ. ინვესტიციების მასშტაბი უკრაინის ბიოლოგიურ აქტივობაში. მონაცემები, მასალები, გთხოვთ, დაალაგოთ მაგიდაზე.

„ჩვენ გამოვდივართ იქიდან, რომ უახლოეს მომავალში ამერიკის შეერთებული შტატების თავდაცვის დეპარტამენტი, აშშ-ის პრეზიდენტის ადმინისტრაცია, ვალდებულია ოფიციალურად გააცნოს მსოფლიო საზოგადოებას ის პროგრამები, რომლებიც განხორციელდა უკრაინაში”, – თქვა ზახაროვამ ბრიფინგზე.

ზახაროვამ იქვე აღნიშნა, რომ რუსეთის სამხედრო ოპერაცია უკრაინაში “მკაცრი გეგმის მიხედვით მიმდინარეობს” და რომ ოპერაცია იძულებითი ხასიათისაა. “იგი კიევის რეჟიმის მიერ დონბასზე რვაწლიანი აგრესიის შედეგია. კიევის მთავრობის მხრიდან ადამიანის უფლებების უგულებელყოფა და სურვილის არქონა შეეჩერებინა რუსულენოვანი მოსახლეობის დისკრიმინაცია”, – თქვა მან.

“ეს ყველაფერი მოხდა გლობალური უსაფრთხოების კატასტროფული დეგრადაციის ფონზე, რომელიც გამოწვეულია ნატოსა და შეერთებული შტატების შესაბამისი ქმედებებით. კრიზისზე პასუხისმგებლობის ლომის წილი ეკისრება ნატოს ქვეყნებს, რომლებიც ახალისებდნენ და მხარს უჭერდნენ კიევის რუსოფობიურ პოლიტიკას, რომლებმაც არა მხოლოდ აღიარეს, არამედ განახორციელეს ანტიკონსტიტუციური გადატრიალება [უკრაინაში] 2014 წელს. რა თქმა უნდა, ბოლო წვეთი გახდა პოლიტიკოსების განცხადებები ბირთვული იარაღის ფლობაზე პრეტენზიების შესახებ, რაც მათ თავიანთი ოფიციალური უფლებამოსილებით გააკეთეს”, – თქვა ზახაროვამ.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან