„მოიცალეს“ ჩემი საგარეო პოლიტიკური პოზიციის და აკადემიური ბიოგრაფიის გაყალბებისთვის,“ – დაწერა დღეს, 9 მარტს, ფეისბუქში აჭარის მთავრობის თავმჯდომარემ თორნიკე რიჟვაძემ.
თორნიკე რიჟვაძე ვრცელი განმარტებით ეხმიანება კიევის უნივერსიტეტის განცხადებას იმის შესახებ, რომ რიჟვაძის სწავლა კიევის უნივერსიტეტის დოქტორანტურაში არ დასრულებულა სამეცნიერო ხარისხის მიღებით, რადგან სწავლა შეწყდა. ასევე, მედიაში 7 მარტს გავრცელებულ მისსავე კომენტარს, როცა ჟურნალისტის კითხვაზე – „ვინ დაიწყო ომი, რუსეთმა თუ უკრაინამ“, პასუხად აჭარის მთავრობის თავმჯდომარემ თქვა, რომ ამ კითხვას „დარგის ექსპერტებმა“ უნდა უპასუხონ.
უკრაინის უნივერსიტეტის მიერ 8 მარტს გავრცელებული ინფორმაციით, თორნიკე რიჟვაძეს არ მიუღია კიევის უნივერსიტეტის დიპლომი და ინფორმაცია იმის შესახებ, რომ რიჟვაძეს აქვს დოქტორის ხარისხი, სიმართლეს არ შეესაბამება.
თორნიკე რიჟვაძე ფეისბუქზე გამოქვეყნებულ განმარტებაში ადასტურებს, რომ დოქტორანტურა არ დაუსრულებია და ამბობს, რომ ყველა ოფიციალურ წყაროში მითითებულია ამის შესახებ:
„2015 წელს ჩავაბარე ტარას შევჩენკოს სახელობის კიევის სახელმწიფო უნივერსიტეტში დოქტორანტურაში ენერგეტიკის სამართლის მიმართულებით, 2017 წელს, სამწუხაროდ, გარდაიცვალა დისერტაციის აკადემიური ხელმძღვანელი, ალექსანდრე ზადოროჟნი, ოჯახური და სამსახურებრივი გარემოებების გათვალისწინებით იძულებული გავხდი საკუთარი სურვილით ამეღო აკადემიური შვებულება და შემეწყვიტა სწავლა. შესაბამისად, ყველა ოფიციალურ წყაროში მითითებულია დოქტორანტი,“ – აღნიშნავს თორნიკე რიჟვაძე ფეისბუქპოსტში.
ამავე განმარტებაში თორნიკე რიჟვაძე „რიტორიკულ-პროვოკაციულს“ უწოდებს ჟურნალისტის კითხვას, რომელმაც მას, როგორც აჭარის მთავრობის თავმჯდომარეს და „ქართული ოცნების“ პოლიტსაბჭოს წევრს ორჯერ სთხოვა გამოეხატა თავისი პოზიცია საკითხზე – ვინ დაიწყო ომი უკრაინაში.
„რუსულ ოკუპაციასთან დაკავშირებით ჩემი პოზიცია და კონკრეტული ქმედებები საჯაროდ ცნობილია! ჩვენმა ხელისუფლებამ ყველა საერთაშორისო ფორმატში დაგმო რუსული აგრესია და მხარი დაუჭირა უკრაინის სუვერენიტეტს და ტერიტორიულ მთლიანობას! ე.წ. ჟურნალისტის რიტორიკულ-პროვოკაციულ კითხვაზე ომის დაწყებასთან დაკავშირებით პასუხიც გახლდათ შესაბამისი,“ – წერს თორნიკე რიჟვაძე.
ვრცელი განმარტების მიუხედავად, თორნიკე რიჟვაძე არც ამ ფეისბუქპოსტში პასუხობს კითხვას: ვინ დაიწყო ომი უკრაინაში, ან რატომ არ მიიჩნია საჭიროდ, ან ვერ გაბედა „ოცნების“ ხელისუფლებამ საპარლამენტო რეზოლუციაში ჩაეწერა სიტყვა „რუსეთი“.
„რუსული აგრესია“ – ამჯერად ასე ამბობს ომის ნაცვლად თორნიკე რიჟვაძე.
„ჩვენმა ხელისუფლებამ ყველა საერთაშორისო ფორმატში დაგმო რუსული აგრესია და მხარი დაუჭირა უკრაინის სუვერენიტეტს და ტერიტორიულ მთლიანობას,“ – აღნიშნავს თორნიკე რიჟვაძე ისევე, როგორც ამას „ოცნების“ სპიკერები, ასევე პრემიერი ღარიბაშვილი აკეთებს და ცდილობს გვერდი აუაროს ისეთ მნიშვნელოვან საკითხებს, როგორიცაა სანქციები რუსეთის მიმართ, რასაც საქართველო არ უერთდება და რის გამოც უკრაინამ პროტესტის ნიშნად თავისი ელჩი კონსულტაციისთვის გაიწვია საქართველოდან, ან, მაგალითად, უკრაინიდან რამდენი დევნილის მიღებას აპირებს საქართველო.
აქტუალურ კითხვებზე პასუხის გაცემის თუ განმარტების ნაცვლად თორნიკე რიჟვაძემ წლების წინ დასრულებული დისკუსიის განახლებაც სცადა – რა ჩაიწერა ევროსაბჭოს რეზოლუციაში, რასაც „ნაციონალური მოძრაობის“ ხელისუფლებამ ხელი მოაწერა.
„განსაკუთრებით სამარცხვინოა, ევროსაბჭოს საპარლამენტო ასამბლეის რეზოლუციაზე ხელმომწერების, 2008 წლის ომის დაწყებაში საქართველოს ბრალმდებელი პარტიისა და მათი ტელევიზიების მიერ დასმულ პროვოკაციულ კითხვას სერიოზულად უნდა ვუპასუხო?! მე იქით მაქვს შეკითხვა, 2008-ში ვინ დაიწყო? შემთხვევით მაშინაც რუსეთმა ხომ არა? თუ კი, მაშინ ამას ხელი როგორ მოაწერეთ?! შემთხვევით მოღალატეები ხომ არ ხართ ამის გამო?!“ – წერს თორნიკე რიჟვაძე.
ამ კითხვას წლების განმავლობაში სვამდნენ „ქართული ოცნების“ ლიდერები.
„ნაციონალური მოძრაობის“ წარმომადგენლები კი ადასტურებენ, რომ რეზოლუციის მე-5 მუხლი მართლაც პრობლემურია საქართველოსთვის, თუმცა მიუთითებენ, რომ იმ პერიოდში, როცა ომი ახალი დასრულებული იყო, ხოლო რუსეთმა დამოუკიდებელ სახელმწიფოებად აღიარა ოკუპირებული ტერიტორიები და ყველგან აცხადებდა, რომ საქართველომ დაიწყო ომი და ეთნიკურ ნიადაგზე კონფლიქტისას გენოციდი მოუწყო ოსებს, საერთაშორისო ორგანიზაციაში პირველად იქნა მიღებული რეზოლუცია, რომელიც ოკუპანტად რუსეთს აღიარებს და გმობს მოსკოვის მიერ აფხაზეთისა და ცხინვალის რეგიონების აღიარებას.
