„11 დღეა ვიბრძვით. თავისუფლებისთვის. სახელმწიფოსთვის. ჩვენ გავუძელით. უკვე ვიცით, როგორ ავაშენებთ ჩვენს ქვეყანას თავიდან”, – განაცხადა დღეს, 6 მარტს, უკრაინის პრეზიდენტმა ვოლოდიმირ ზელენსკიმ.
დღეს, 6 მარტს, უკრაინის საპორტო ქალაქ მარიუპოლში, რომელიც საოკუპაციო ძალების ალყაშია, დროებითი, ე.წ. ჰუმანიტარული ზავი ამოქმედდა. ზავი ადგილობრივი დროით 10:00 საათზე შევიდა ძალაში და 21:00 საათამდე გასტანს. ამ დროის განმავლობაში, მოქალაქეები შეძლებენ ქალაქის დატოვებას.
მსგავსი ზავი უნდა ამოქმედებულიყო გუშინაც, თუმცა უკრაინული მხარის თანახმად, მოწინააღმდეგემ იგი დაარღვია და ის მიმართულებები დაბომბა, რომლითაც მოსახლეობას ქალაქი უნდა დაეტოვებინა.
გაერთიანებული სამეფოს პრემიერ-მინისტრმა, ბორის ჯონსონმა შეიმუშავა 6-პუნქტიანი გეგმა, რომლის მიზანიც რუსეთზე ზეწოლის გაძლიერება და უკრაინის მხარდაჭერაა.
რუსეთი უკრაინაში 24 თებერვალს, გამთენიისას, შეიჭრა და მას შემდეგ განუწყვეტლივ ბომბავს როგორც სამხედრო ობიექტებს, ისე მშვიდობიან მოსახლეობას.
ამ თემაზე:
ბოლო 24 საათში უკრაინა 118 ათასმა ადამიანმა დატოვა, 11 ათასი კი დაბრუნდა
