დღეს, 25 თებერვალს, ხულოში მცხოვრებმა ახალგაზრდებმა უკრაინის მხარდასაჭერი აქცია გამართეს. მათი თქმით, დღეს განსაკუთრებული მხარდაჭერა სჭირდება უკრაინას და უკრაინელ ახალგაზრდებს, რომლებიც იბრძვიან საკუთარი ქვეყნის თავისუფლებისა და მშვიდობისთვის.
„გაუმართლებელია რუსული აგრესია როგორც უკრაინის, ასევე საქართველოს მიმართ. არა მარტო ჩვენ, ახალგაზრდები, ვართ უკრაინის მიმართ სოლიდარულები, ხულოს მოსახლეობაშიც მსგავსი განწყობაა.
ასეთ დროს ასევე მნიშვნელოვანია რუსული დეზინფორმაციის წინააღმდეგ ბრძოლაც და ამ საკითხზეც ვისაუბრეთ ახალგაზრდებმა. ასევე ოჯახის წევრებსაც ვესაუბრეთ, რომ ყველა ინფორმაცია გადაამოწმონ ომთან დაკავშირებით“- გვითხრა ავთო შერვაშიძემ, აქციის მონაწილემ.
ხულოელი ახალგაზრდების მხარდაჭერა უკრაინას. ფოტო: ავთო შერვაშიძე
სოლიდარობის აქციაზე იმყოფებოდა ლია დეკანაძე, რომელიც „სოლიდარობის თემის“ აქტივისტია.
„ჩვენ პატივი მივაგეთ უკრაინაში რუსული აგრესიის წინააღმდეგ ბრძოლაში დაღუპულ ადამიანებს, რადგან მიგვაჩნია, რომ ასეთ დროს თანადგომა ნუგეშია ადამიანებისთვის.
ჩვენ, ახალგაზრდები კარგად ვიაზრებთ რუსულ საფრთხეებს და იმასაც ვხვდებით, რომ უკრაინის მსგავსად, შესაძლოა საქართველოც აღმოჩნდეს იმ მდგომარეობაში, რაშიც დღეს არის უკრაინა.
ჩვენ, ახალგაზრდებმა, თანმიმდევრულად და ჯიუტად უნდა ვაჩვენოთ ჩვენი თანადგომა უკრაინას, რადგან გვინდა, რომ თავისუფალ და მშვიდობიან უკრაინაში იცხოვრონ. რაც ჩვენი ქვეყნისთვის გვსურს, ის გვინდა უკრაინელი ხალხისთვისაც,“ – ამბობს ლია დეკანაძე.
ახალგაზრდების თქმით, დღეს ძალიან მნიშვნელოვანია ჩართულობა უკრაინის მხარდასაჭერად. „ეს შეიძლება იყოს დონაცია, ეკონომიკური მხარდაჭერა და ის, რაც ჩვეულებრივ მოქალაქეებს შეგვიძლია, რომ გავაკეთოთ, თუნდაც სიტყვით მხარდაჭერა.
დღეს ჩვენ ვიხილეთ, თუ რამდენად მძიმე მდგომარეობაშია სრულიად სამყარო. რუსული აგრესიის წინა ფრონტზე იბრძვის უკრაინა და უკრაინელი ხალხი. ჩვენი ვალდებულებაა არსებული შესაძლებლობით მხარი დავუჭიროთ მათ,“ – ამბობენ სოლიდარობის აქციაში მონაწილე ახალგაზრდები.
ხულოელი ახალგაზრდები უკრაინის მხარდასაჭერად.
