კიევს 25 თებერვლის დილიდან ბომბავენ.
„საშინელი რუსული სარაკეტო თავდასხმაა კიევზე. ბოლოს ჩვენს დედაქალაქს ასეთი გამოცდილება 1941 წელს ჰქონდა, როდესაც ნაცისტური გერმანია დაესხა თავს. უკრაინამ ის ბოროტება დაამარცხა და დაამარცხებს ამასაც. შეჩერდი პუტინ. რუსეთის იზოლაცია. გაანადგურეთ ყველა კავშირი. გამოაგდეთ რუსეთი ყველაფრიდან”, – წერს უკრაინის საგარეო საქმეთა მინისტრი, დმიტრო კულება Twitter-ზე.
უკრაინის შინაგან საქმეთა მინისტრის მრჩევლის, ანტონ გერაშენკოს განცხადებით, კიევში ჩამოვარდნისას რუსული თვითმფრინავი მრავალსართულიან საცხოვრებელ კორპუსს შეეჯახა: „სავარაუდოდ, დიდია მსხვერპლი მშვიდობიან მოსახლეობაში“.
უკრაინის შინაგან საქმეთა სამინისტროს ინფორმაციით, მრავალსართულიანი საცხოვრებელი კორპუსი შედგება ორი განყოფილებისგან: პირველი სექცია 10-სართულიანია, ხოლო მეორე 16-სართულიანი.
გერაშჩენკო უცხოელ ჟურნალისტებსაც ესაუბრა, სადაც ამბობს, რომ კიევი ბალისტიკური რაკეტებით იბომბება.
25 თებერვალი მეორე დღეა, რაც რუსეთმა უკრაინის წინააღმდეგ სრულმასშტაბიანი ომი დაიწყო. რუსული ჯარები უკრაინაში შეიჭრნენ სამი მხრიდან — აღმოსავლეთიდან (ბელარუსი), ჩრდილოეთიდან (დონეცკი-ლუგანსჯი) და სამხრეთიდან (ყირიმი). პარალელურად, არტილერია და ავიაცია ბომბავს უკრაინის ქალაქებს, მათ შორის, დედაქალაქ კიევს. რუსეთის პრეზიდენტი ვლადიმირ პუტინი აცხადებს, რომ მათი მიზანი „უკრაინის დემილიტარიზაცია და დენაციფიკაციაა“.
უკრაინის მთავრობის ინფორმაციით, ომის პირველ დღეს დაიღუპა, სულ მცირე, 137 ადამიანი, რომელთა შორის, არიან სამოქალაქო პირებიც. უკრაინულმა ჯარმა გაანადგურა რუსეთის 160 ჯავშანტექნიკა, 5 თვითმფრინავი და 6 ვერტმფრენი.
რუსულმა არმიამ დაბომბა არაერთი სტრატეგიული ობიექტი, დაიკავეს 1986 წელს აფეთქებული ჩერნობილის ატომური ელექტროსადგური.
პარალელურად, დასავლეთის ქვეყნებმა, მათ შორის, აშშ-მ განაცხადეს, რომ რუსეთის აგრესიის საპასუხოდ აწესებენ მძიმე ეკონომიკურ სანქციებს.
კიევი /25.02.2022 / ფოტო: უკრაინის შინაგან საქმეთა სამინისტრო
მთავარი ფოტო: კიევი, 25/02/2022 / ფოტო: უკრაინის შსს
