დღეს, 24 თებერვალს, ბათუმში უკრაინის მხარდასაჭერად სოლიდარობის ორი აქცია გაიმართება. აქცია 17 საათზე ევროპის მოედანზე დაიწყება.
ბათუმში 19 საათზე უკრაინის სოლიდარობის აქცია დაანონსებულია ასევე ევროპის მოედანზე.
დღესვე, უკრაინის მხარდასაჭერი აქცია გაიმართება თბილისში, რესპუბლიკის მოედანზე. ეს აქცია სხვადასხვა სამოქალაქო მოძრაობისა და პარტიის ორგანიზებით დაიგეგმა. მათ შორის არიან: „დროა“, „სირცხვილია“, ენმ-ის ახალგაზრდული ფრთა – „შეცვალე“ და „გირჩი – მეტი თავისუფლება“.
რუსეთმა დღეს, 24 თებერვლის დილით, უკრაინაში სრულმასშტაბიანი ომი წამოიწყო. რუსეთის პრეზიდენტმა პუტინმა დონბასისა და ლუგანსკის სეპარატისტული რეგიონების დაცვის საბაბით უკრაინაში „სამხედრო ოპერაციის“ დაწყების შესახებ განაცხადა. პუტინმა იარაღის დაყრისკენ მოუწოდა უკრაინელ ჯარისკაცებს.
როგორც უკრაინაში მყოფი ჟურნალისტები იტყობინებიან, პუტინის განცხადებიდან მალევე დაიწყო სტრატეგიული ობიექტების დაბომბვა უკრაინის ქალაქების შემოგარენში, მათ შორის, კიევში.
