სტატისტიკის ეროვნული სამსახურის მონაცემებით, თურქეთის შემდეგ რუსეთი მეორე ყველაზე დიდი იმპორტიორი ქვეყანაა საქართველოში.
სტატისტიკის მიხედვით, 2022 წლის იანვარში რუსეთიდან საქართველოში შემოტანილია 85 მილიონ 929 ათასი აშშ დოლარის პროდუქცია, ხოლო საქართველოდან რუსეთში გატანილია 42 მილიონ 684 ათასი აშშ დოლარის პროდუქცია.
წინა, 2021 წლის იანვართან შედარებით კი, მიმდინარე წლის იანვარში რუსეთიდან იმპორტი 30,2 მილიონი დოლარითაა გაზრდილი, მაშინ, როცა ექსპორტი რუსეთში გაზრდილია მხოლოდ 19,9 მილიონი დოლარით.
მთლიანობაში კი რუსეთიდან საქართველოში მიმდინარე წლის იანვარში 43 მილიონი დოლარით მეტი პროდუქციაა შემოტანილი, ვიდრე გატანილია [ეს მაჩვენებელი გასული წლის იანვარში 33 მილიონი დოლარი იყო].
2022 წლის იანვარში რუსეთიდან საქართველოში შემოტანილია:
- ნავთობის აირები და აირისებრი ნახშირწყალბადები – 12,5 მილიონი დოლარის
- ნავთობი და ნავთობპროდუქტები – 8,5 მილიონი დოლარის
- სატელეფონო აპარატები – 3,7 მილიონზე მეტი დოლარის
- ხორბალი და მესლინი – 3,5 მილონი დოლარის
- მარგარინი – 3,3 მილიონი დოლარის
- დანარჩენი საქონელი – 54,1 მილიონი დოლარის
2022 წლის იანვარში საქართველოდან რუსეთში გატანილია:
- ფეროშენადნობები – 13,2 მილიონი დოლარის
- ყურძნის ნატურალური ღვინოები – 8,7 მილიონი დოლარის
- მინერალური და მტკნარი წყლები – 4,7 მილიონი დოლარის
- სიგარები, სიგარილები და სიგარეტები, თამბაქოს ან მისი შემცვლელებისგან – 2,9 მილიონი დოლარის
- ციტრუსის ნაყოფი- ახალი და გამხმარი – 2 მილიონი დოლარის.
- დანარჩენი საქონელი – 11 მილიონი დოლარის.
ათ უმსხვილეს სავაჭრო პარტნიორ ქვეყნებს შორის [2022 წლის იანვრის მონაცემებით], თურქეთისა და რუსეთის შემდეგ, მესამე ადგილზეა აზერბაიჯანი, შემდეგ მოდიან: ჩინეთი, უკრაინა, ბულგარეთი, აშშ, იაპონია, გერმანია და სომხეთი.
რაც შეეხება პირველ ადგილზე მყოფ თურქეთს. თურქეთიდან საქართველოში გასულ წელს 93,3 მილიონი დოლარის პროდუქცია შემოვიდა, საქართველოდან კი – 21,4 მილიონი დოლარის პროდუქცია გავიდა.
