ნეტგაზეთი • RU

საქართველოში კოვიდის შემთხვევების 95% ომიკრონის შტამია

საქართველოს დაავადებათა კონტროლისა და საზოგადოებრივი ჯანდაცვის ცენტრის ცნობით, მათემატიკური მოდელირებით ფასდება, რომ საქართველოში კორონავირუსის დადებითი შემთხვევების დაახლოებით 95% ომიკრონითაა განპირობებული.

15 თებერვლის მონაცემებით, საქართველოში დაახლოებით 170 000 ადამიანია ერთდროულად ინფიცირებული კორონავირუსით, გასულ დღეებში ეს რიცხვი კიდევ უფრო დიდი იყო.

ჯანდაცვის სპეციალისტები იმედოვნებენ, რომ მომდევნო დღეებში კორონავირუსის გავრცელების ტემპი საქართველოში დაიკლებს, თუმცა საზოგადოება ამან „არ უნდა გაათამამოს“.

გუშინ, 15 თებერვალს, დაავადებათა კონტროლისა და საზოგადოებრივი ჯანდაცვის ცენტრის დირექტორმა, ამირან გამყრელიძემ კიდევ ერთხელ გაუსვა ხაზი ორჯერადი აცრის, ბუსტერისა და პირბადის ტარების მნიშვნელობას:

„აცრა და განსაკუთრებით ბუსტერი, დღეს, ომიკრონთან მიმართებაში, იცავს ადამიანს გართულებისგან, რაც იწვევს ჰოსპიტალიზაციას, მოხვედრას ინტენსიურ თერაპიაში, მოხვედრას რეანიმაციაში და ფატალურ გამოსავალს.

პირბადეს ჩვენ ვერ შეველევით და ეს უნდა გახდეს ჩვენი ცხოვრების მთავარი წესი.

ომიკრონი და კორონავირუსული ინფექცია არ მორჩება, ვთქვათ, ერთ დღეს, არ იქნება, გავიღვიძებთ ხვალ და უცბად აღარა გვაქვს პანდემია“ – განაცხადა მან.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com