„ალი და ნინოს“ აღდგენისთვის „ბათუმის ბულვარმა“ თითქმის 200 ათასი ლარი ორი თვის წინ დახარჯა, უფრო ზუსტად – 199 620 ლარი. ბულვარის ადმინისტრაციამ შესრულებული სამუშაოები გასული წლის დეკემბერში ჩაიბარა, თუმცა „ალი და ნინო“ ბათუმის სანაპიროზე ისევ სრულად ჩაბნელებულია და აღარ მოძრაობს.
„შტორმის დროს წყალი ჩავიდა სისტემაში და დაზიანდა. კიდევ კარგი, რომ დროულად გამოვლინდა სუსტი წერტილი,“ – ამბობს „ბათუმელებთან“ პაატა სანაია, ის კომპანია „თკ სტუდიოს“ დირექტორია. ამ კომპანიასთან გააფორმა ბათუმის ბულვარის ადმინისტრაციამ პირდაპირი შესყიდვის ხელშეკრულება 2021 წლის 11 ნოემბერს.
ხელშეკრულების მიხედვით, „მექანიკური ქანდაკების „Man and Woman“ – [ქალი და კაცი] „ალი და ნინო“ – მართვის და განათების საკონტროლო სისტემის აღდგენის სამუშაო“ უნდა შესრულებულიყო. ბულვარის ადმინისტრაციაში განმარტავენ, რომ დაზიანების ზუსტი მიზეზი უცნობია, თუმცა „ალი და ნინოს“ ქანდაკებაზე ბოლო პერიოდში გარეგანათების სისტემა დაზიანდა და ქანდაკების მოძრაობაც შენელდა. ბულვარის ადმინისტრაციაში არჩიეს ქანდაკების აღდგენის სამუშაო ისევ თამარ კვესიტაძის კომპანიისთვის შეეკვეთათ, რომლის იდეითაც მომზადდა ეს სკულპტურა 2010 წელს.
„მე თანაავტორი ვარ „ალი და ნინოს“, ეს უჟანგავი ფოლადისგანაა დამზადებული, რაღაც ნაწილი დაზიანდა ამჯერად, ფორსმაჟორი იყო,“ – გვიყვება პაატა სანაია, რომელიც ზუსტ თარიღს ვერ გვეუბნება, როდის დაიწყებს მოძრაობას „ალი და ნინო“ ბათუმის ბულვარში, – „განათებები ჩვენ სადმე კი არ შეგვიძენია, ჩვენი ხელით დავამზადეთ სპეციალურად… კოვიდი დაგვემართა ყველას და ამიტომაც გაჭიანურდა სამუშაოები.
თუ კარგი ამინდი წავა, მალე დასრულდება. არ გვინდა, ისევ წვიმა ჩავიდეს… როგორც ჩანს, ისევ ძლიერმა წვიმამ დააზიანა, შტორმის დროს,“ – გვითხრა პაატა სანაიამ.
ბათუმის ბულვარის დირექტორის მოადგილე, სოფიო გუჯაბიძე კი განმარტავს, რომ გაწეული სამუშაო მართლაც გასული წლის დეკემბერში ჩაიბარეს და „ალი და ნინო“ რამდენიმე დღე მოძრაობდა, მაგრამ სატესტო განათების დროს დაფიქსირდა ტექნიკური პრობლემა, რის შემდეგაც გარანტიის ფარგლებში განათების ნაწილს შეაკეთებენ.
„დიდთოვლობის დროს დაზიანდა, მანამდე მოძრაობდა „ალი და ნინო“, განათებაც იყო, რაც პირველად ვერსიაზე უკეთესიც კი გამოვიდა… ჯგუფს ჰქონდა კორონავირუსი და ამიტომაც დროში გაგრძელდა ეს სამუშაო. გარანტიის ვადაა 3 წელი,“ – გვითხრა სოფიო გუჯაბიძემ.
„ალი და ნინო“. ფოტო: ბათუმის ბულვარი
„ბათუმის ბულვარის“ ადმინისტრაციის ინფორმაციით, უახლოეს დღეებში ამოძრავდება „ალი და ნინო“ და ისევ განათდება.
