ბერლინის კინოფესტივალზე ზაზა ხალვაშის ბოლო ფილმს აჩვენებენ

წელს ბერლინის საერთაშორისო კინოფესტივალზე, ევროპული კინობაზრობის ფარგლებში 3 ქართულ მხატვრულ ფილმს აჩვენებენ.

ევროპულ კინობაზარზე საქართველოს ეროვნულ კინოცენტრი წარადგენს:

• „სამურაი დასვენების ჟამს“ – რეჟისორი ლევან თუთბერიძე (საქართველო) 13 თებერვალი, 12:40 საათი, Virtual Cinema 3;
• „მშვენიერი ელენე“ – რეჟისორი გიორგი ოვაშვილი (საქართველო, საფრანგეთი, თურქეთი) 14 თებერვალი, 15:00 საათი, Virtual Cinema 23;
• „ლოტო – იგავი ზღვისპირა ქალაქზე“ – რეჟისორი ზაზა ხალვაში (საქართველო, ლიეტუვა) 15 თებერვალი, 12:40 საათი, Virtual Cinema 6.

„ლოტო – იგავი ზღვისპირა ქალაქზე“ ზაზა ხალვაშის ბოლო ნამუშევარია. რეჟისორი ფილმზე მუშაობის პერიოდში, 62 წლის ასაკში გარდაიცვალა.

პანდემიის გამო ბერლინის 72-ე საერთაშორისო კინოფესტივალი ჰიბრიდული ფორმატით გაიმართება. 10-17 თებერვალს გაიმართება ევროპული კინოს ვირტუალური ბაზრობა – European Film Market, ხოლო 10-20 თებერვალს ბერლინის კინოთეატრებში შედგება ფესტივალის ყველა ტრადიციული სექციის, მათ შორის საერთაშორისო კონკურსის, პანორამის, ფორუმის, რეტროსპექტივის ფილმების ჩვენება.

ასევე, წელს, ბერლინის კინოფესტივალის ერთ-ერთ სექციაში სახელწოდებით – „წიგნები ბერლინალეზე“, რომელიც სხვადასხვა ლიტერატურული ნაწარმოების სამომავლო ეკრანიზაციის ხელშეწყობის მიზნით შეიქმნა, 10 წიგნს შორის წარმოდგენილი იქნება ქართველი მწერლის, ნინო ხარატიშვილის ახალი რომანი „უკმარი სინათლე“.

___________________

ფოტოზე: ზაზა ხალვაში ფილმზე მუშაობისას. კადრი ეროვნული კინოცენტრის ვიდეომასალიდან.