Batumelebi | ბოსტნეული, ზეთი და ყველი ისევ გაძვირდა – ინფლაციის მაჩვენებლები ბოსტნეული, ზეთი და ყველი ისევ გაძვირდა – ინფლაციის მაჩვენებლები – Batumelebi
ნეტგაზეთი • RU

ბოსტნეული, ზეთი და ყველი ისევ გაძვირდა – ინფლაციის მაჩვენებლები

2022 წლის იანვარში წინა თვესთან შედარებით ინფლაციის დონემ საქართველოში 1.1 პროცენტი, ხოლო წლიური ინფლაციის დონემ 13.9 პროცენტი შეადგინა.

სტატისტიკის ეროვნული სამსახურის ცნობით, 2022 წლის იანვარში, 2021 წლის დეკემბერთან შედარებით, ბოსტნეულსა და ბაღჩეულზე ფასები გაიზარდა 8.4 პროცენტით; ხილსა და ყურძენზე – 7.4 პროცენტით; მინერალურ და წყაროს წყალზე, უალკოჰოლო სასმელებსა და ნატურალურ წვენებზე – 4.1 პროცენტით; რძეზე, ყველსა და კვერცხზე – 3.2 პროცენტით; ყავაზე, ჩაიზე და კაკაოზე – 1.4 პროცენტით; თევზეული – 1.2 პროცენტით; ხორცი და ხორცის პროდუქტები კი – 1.1 პროცენტით გაძვირდა.

რაც შეეხება წლიურ ინფლაციას, საქსტატის ცნობით, სურსათისა და უალკოჰოლო სასმელების ჯგუფში ფასები გაიზარდა 16.2 პროცენტით, რაც წლიურ ინფლაციაზე 5.27 პროცენტული პუნქტით აისახა.

ფასები მომატებულია შემდეგ ქვეჯგუფებზე:

  • ბოსტნეული და ბაღჩეული – 23.3 პროცენტი
  • პური და პურპროდუქტები – 20.5 პროცენტი
  • ზეთი და ცხიმი – 19.6 პროცენტი
  • მინერალური და წყაროს წყალი, უალკოჰოლო სასმელები და ნატურალური წვენები – 18.3 პროცენტი
  • შაქარი, ჯემი და სხვა ტკბილეული – 18.2 პროცენტი
  • თევზეული – 16.6 პროცენტი
  • რძე, ყველი და კვერცხი – 14.4 პროცენტი
  • ხილი და ყურძენი – 13.7 პროცენტი
  • ხორცი და ხორცის პროდუქტები – 11.9 პროცენტი
  • ყავა, ჩაი და კაკაო – 7.8 პროცენტი

ასევე, წლიური ინფლაციის მაჩვენებლებით, ჯგუფში –  საცხოვრებელი, წყალი, ელ.ენერგია, აირი – დაფიქსირდა ფასების 44.8-პროცენტიანი მატება, რაც 3.69 პროცენტული პუნქტით აისახა წლიურ ინფლაციაზე.

ფასები გაიზარდა:

  • ელექტროენერგია, აირი და სათბობის სხვა სახეები – 68 პროცენტით
  • წყალმომარაგება და საცხოვრებელთან დაკავშირებული სხვა მომსახურება – 58 პროცენტით [საქსტატი განმარტავს, რომ 2022 წლის იანვარში კომუნალური ტარიფები შედარებულია 2021 წლის იანვრის სუბსიდირებულ ტარიფებთან, რაც იწვევს ზრდის შედარებით მაღალ მაჩვენებელს].

ასევე, ტრანსპორტის ჯგუფში ფასები გაიზარდა 16.2 პროცენტით, რაც 2.08 პროცენტული პუნქტით აისახა მთლიანი ინდექსის ზრდაზე. საქსტატის ცნობით, ფასები, ძირითადად, მომატებულია პირადი სატრანსპორტო საშუალებების ექსპლუატაციაზე – 23.3 პროცენტით.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com