Batumelebi | რატომ არ აწვდიან გაზს მოსახლეობას ქობულეთის სოფლებში, სადაც მილები შარშან გაიყვანეს რატომ არ აწვდიან გაზს მოსახლეობას ქობულეთის სოფლებში, სადაც მილები შარშან გაიყვანეს – Batumelebi
ნეტგაზეთი • RU

რატომ არ აწვდიან გაზს მოსახლეობას ქობულეთის სოფლებში, სადაც მილები შარშან გაიყვანეს

ქობულეთის სოფლებში – ალამბარსა და მუხაესტატეში, სახელმწიფო პროგრამის ფარგლებში გაზის მილების გაყვანა 2021 წლის აპრილში დასრულდა, თუმცა მოსახლეობის გაზიფიცირება ამ დრომდე არ დაწყებულა.

ამ სოფლებში გაზსადენი ქსელის მოსაწყობად ბიუჯეტიდან ჯამში 3 083 678 ლარი დაიხარჯა.

მოსახლეობის ნაწილი ფიქრობს, რომ გაზიფიცირების არდაწყების მიზეზი უხარისხოდ შესრულებული სამუშაოებია, რასაც „ბათუმელებთან“ უარყოფს პროექტის განმახორციელებელი „გაზის ტრანსპორტირების კომპანია“.

„ჩატარდა შესაბამისი ექსპერტიზა, დასკვნა დადებითია და ჩვენმა კომპანიამ 2021 წლის სექტემბერში წერილობით მიმართა სახელმწიფო ქონების ეროვნულ სააგენტოს, რომ გაზსადენი მილები ალამბარსა და მუხაესტატეში მზად არის შემდგომი ექსპლუატაციისთვის. სააგენტომ გაზსადენი უნდა გადასცეს გაზის გამანაწილებელ კომპანიას, ამ შემთხვევაში „სოკარს“ და ამის შემდეგ დაიწყება მოსახლეობის გაზიფიცირება. ამ პროცესის დაწყებას კი, მთავრობის შესაბამისი დადგენილება სჭირდება“, – გვითხრეს გაზის ტრანსპორტირების კომპანიაში, რომელიც სახელმწიფო კომპანიაა.

„სოკარის“ აჭარის ფილიალში განაცხადეს, რომ გაზსადენი მათზე ამ დროისთვის გადაცემული არ არის.

რატომ ჭიანურდება ქსელის „სოკარზე“ გადაცემა და მოსახლეობის გაზიფიცირება?

„ბათუმელები“ სახელმწიფო ქონების ეროვნულ სააგენტოს დაუკავშირდა.

„ადმინისტრაციული საქმისწარმოება დაწყებულია. მიმდინარეობს მიმოწერა „სოკართან“ გარკვეული პირობების დაზუსტებაზე გაზსადენის გადაცემასთან დაკავშირებით; „სოკართან“ შეთანხმების შემდეგ მომზადდება მთავრობის შესაბამისი განკარგულების პროექტი. როდის დასრულდება ეს პროცედურები და როდის გავა საკითხი მთავრობის სხდომაზე განსახილველად, ზუსტ დროს ამ ეტაპზე ვერ გეტყვით“, – გვითხრეს ქონების ეროვნულ სააგენტოში.

გასულ წელს გაზის მილების გაყვანა დასრულდა ქობულეთის სხვა სოფლებშიც, თუმცა მოსახლეობას ქსელში ჩართვის საშუალება ალამბარისა და მუხაესტატეს მსგავსად, არც აქ აქვს.

მაგალითად, სოფლებში:

  • ზედა კონდიდში, კოხში, ოხტომსა და ყოფილი ჩოლოქის მეურნეობის (ხულოს ქუჩა) დასახლებაში  გაზიფიცირებისთვის ბიუჯეტიდან დაიხარჯა ჯამში 1 402 837 ლარი;
  • წყავროკაში, ლეღვაში – დაიხარჯა 3 162 623 ლარი;
  • აჭყვისთავში, ზენითში – დაიხარჯა 2 110 556 ლარი.

ამ სოფლებში გაზის მილების გაყვანაზე ტენდერები გაზის ტრანსპორტირების კომპანიას 2020 წელს ჰქონდა გამოცხადებული.

ქსელის „სოკარზე“ გადაცემის შემდეგ ექნება მოსახლეობას უფლება, განცხადებით მიმართოს ამ კომპანიას, მოითხოვოს აბონენტად დარეგისტრირება და მიიღოს სახლში ბუნებრივი აირი.

მოსახლეობისთვის გამანაწილებელ ქსელზე მიერთების საფასური მუნიციპალიტეტებში 400 ლარია [ხოლო თვითმმართველ ქალაქებში – 800 ლარი].

გამანაწილებელ ქსელზე ახალი მომხმარებლის მიერთების ვადად კი, „სოკარისთვის“ 60 დღეა განსაზღვრული – ანუ, კომპანიამ გაზი ახალ აბონენტს განცხადების მიღებიდან მაქსიმუმ 60 სამუშაო დღეში უნდა მიაწოდოს.

გაზის ტრანსპორტირების კომპანიის მიერ გასულ წელს მოწოდებული ინფორმაციით, 2022-2024 წლებში აჭარაში 35 დასახლებული პუნქტის გაზიფიცირებისთვის საჭირო საპროექტო, ასევე სამშენებლო სამუშაოები უნდა ჩატარდეს.

კომპანიამ ასევე მოგვაწოდა აჭარაში იმ დასახლებების ჩამონათვალი, სადაც გაზიფიცირების სამუშაოები 2024 წლის ჩათვლით განხორციელდება [ეს ჩამონათვალი ემთხვევა საქართველოს მთავრობის მიერ დამტკიცებულ გაზიფიცირების ოთხწლიან გეგმას]:

აჭარის რომელ სოფლებში ჩაირთვება ბუნებრივი აირი 2022-2024 წლებში

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com