საქართველოს ენერგეტიკისა და წყალმომარაგების მარეგულირებელი ეროვნული კომისიის [სემეკი] გადაწყვეტილებით, 2020 წლის პირველი იანვრიდან, ახალი მომხმარებლისთვის, ბუნებრივი აირის გამანაწილებელ ქსელზე მიერთების საფასური, თვითმმართველ ქალაქებში გაორმაგდა.
ბათუმში, თბილისში, ქუთაისში, ფოთსა და რუსთავში ახალი მომხმარებელი გაზის [სიმძლავრე 0-6 კვტ] შეყვანაში 400 ლარის ნაცვლად 800 ლარს გადაიხდის. რაც შეეხება დანარჩენ მუნიციპალიტეტებს, ეს ტარიფი სემეკმა უცვლელი დატოვა და ის 400 ლარი იქნება.
ქსელზე მიერთების ვადა კი 40 დღეა. თუმცა, სემეკის ახალი დადგენილებით, „თუ ადგილი აქვს გამანაწილებელ ქსელზე მრავალბინიანი სახლის მიერთებას, ერთობლივი განაცხადით მიმართვის შემთხვევაში, გამანაწილებელ ქსელზე მიერთების უზრუნველყოფის პერიოდი-ვადა განისაზღვრება მიერთების მსურველ(ებ)ის მიერ, ერთობლივი განაცხადით მოთხოვნილი ჯამური სიმძლავრის მიხედვით. იმ შემთხვევაში, თუ მიერთების მსურველ(ებ)ის მიერ ერთობლივი განაცხადით მოთხოვნილი ჯამური სიმძლავრე აღემატება 100 კუბ.მ/სთ, მიერთების უზრუნველყოფის პერიოდი-ვადა შეადგენს 60 სამუშაო დღეს“.
800 ლარში შედის ქსელზე დაერთება და ერთი წერტილი [ოღონდ – როგორც „ბათუმელებს“ „სოკარ ჯორჯია გაზში“ უთხრეს – არა მრავალბინიან კორპუსებში – აქ შიდა ქსელს თავად ბინის მესაკუთრე აწყობს. თუმცა, შესრულებულ სამუშაოს საბოლოოდ, გაზის გამანაწილებელი კომპანია შეამოწმებს და ჩაიბარებს]. რაც შეეხება ყოველი მომდევნო წერტილის დამატებას, აქ საფასურის ოდენობას სემეკი არ არეგულირებს.
ძალაში რჩება ქსელზე მიერთების საფასურის განწილვადება [ე.წ. განვადება], თუმცა ასეთ შემთხვევაში, „მიერთების საფასური განისაზღვრება არსებულ მიერთების საფასურზე თვითმმართველ ქალაქებში 50 ლარის (დღგ-ის ჩათვლით) დამატებით, ხოლო სხვა მუნიციპალიტეტებში 25 ლარის (დღგ-ის ჩათვლით) დამატებით“.
„ბუნებრივი გაზის მიწოდებისა და მოხმარების წესების” დამტკიცების შესახებ შესაბამის დადგენილებაში სემეკმა აღნიშნული ცვლილება 2019 წლის 26 დეკემბერს შეიტანა, რომელიც ძალაში 30 დეკემბერს შევიდა.
„ცვლილება ბუნებრივი აირის სექტორს შეეხო, ვინაიდან არსებული საფასურის ოდენობა, შესრულებული სამუშაოების თვითღირებულებიდან გამომდინარე, არარეალური იყო. ამიტომ რეალური საფასურის დადგენა ხელახლა იყო საჭირო. მიზეზი თვითონ სამუშაოების სირთულეებია, მაგალითად, თვითმმართველ ქალაქებში ძალიან ბევრ ადგილზე, საჭიროა ასფალტის გადათხრა, სხვადასხვა ტექნიკური სამუშაოების ჩატარება [იგივე, ტექნიკის დაქირავება, შეთანხმებები და ა.შ.], რაც სხვა ქალაქებში და მუნიციპალიტეტებში არ დგას დღის წესრიგში“ – გვითხრეს სემეკის პრესსამსახურში.
