Batumelebi | აჭარის ჯანდაცვის სამინისტრო აფინანსებს ღვიძლის, ძვლის ტვინისა და გულის ტრანსპლანტაციას აჭარის ჯანდაცვის სამინისტრო აფინანსებს ღვიძლის, ძვლის ტვინისა და გულის ტრანსპლანტაციას – Batumelebi
ნეტგაზეთი • RU

აჭარის ჯანდაცვის სამინისტრო აფინანსებს ღვიძლის, ძვლის ტვინისა და გულის ტრანსპლანტაციას

მერაბ თებიძე და ლია წულუკიძე ქედის მუნიციპალიტეტის პირველ მაისში ცხოვრობენ. მიმდინარე წლის დასაწყისში მერაბს მოულოდნელად განუვითარდა ღვიძლის უკმარისობა, 29 დღიანი რეანიმაციული მკურნალობის შემდეგ მას ექიმებმა ღვიძლის ტრანსპლანტაცია შესთავაზეს, პაციენტი დათანხმდა, დონორობაზე სურვილი საკუთარმა მეუღლე გამოთქვა.

მერაბ თებიძე და ლია წულუკიძე

მერაბ თებიძე და ლია წულუკიძე

აჭარის ჯანდაცვის სამინისტრო ღვიძლის ტრანსპლანტაციას 2016 წლიდან აფინანსებს. საწყის ეტაპზე ზღვრული თანხა 10 000 ლარს შეადგენდა. თანხა ყოველწლიურად იზრდება და ამჟამად ერთი პაციენტისათვის გათვალისწინებულია 80 000-დან 100 000 ლარამდე. დღემდე სამინისტროს პროგრამის ფარგლებში დაფინანსდა 30 პაციენტის ღვიძლის ტრანსპლანტაცია.

გარდა ღვიძლის ტრანსპლანტაციისა სამინისტრო აფინანსებს ძვლის ტვინის ტრანსპლანტაციას ყველა ასაკის პაციენტისათვის, როგორც საქართველოს სამედიცინო დაწესებულებებში, ისე უცხოეთში. ვახტანგ თავბერიძე ერთ-ერთ პირველთაგანია, რომელსაც სამინისტრომ 2019 წელს ძვლის ტვინის ტრანსპლანტაცია დაუფინანსა. ოპერაცია წარმატებით დასრულდა, ბატონი ვახტანგი საკონტროლო კვლევებზე კლინიკას უკვე იშვიათად აკითხავს და ცხოვრებას ჩვეულ რეჟიმში აგრძელებს. დადის სამსახურში, კითხულობს ლექციებს.

ვახტანგ თავბერიძე

ვახტანგ თავბერიძე

„დღემდე ძვლის ტვინის ტრანსპლანტაცია დაუფინანსდა 25 მოქალაქეს. სიახლეა აღნიშნული მიმართულებით მომავალი წლიდან გაიზრდება ძვლის ტვინი ალოგენური ტრანსპლანტაციის დაფინანსება – 160 000 ლარამდე და დაიწყება ძვლის ტვინი ჰაპლოიდური ტრანსპლანტაციის დაფინანსება – 1800 ლარით,“- აცხადებს მინისტრის მოადგილე, მარი ზანაქიძე.

მარი ზანაქიძე

მარი ზანაქიძე

მიმდინარე წლიდან აჭარის ჯანდაცვის სამინისტრომ დაიწყო გულის ტრანსპლანტაციის დაფინანსება, თითოეულ პაციენტზე 200 000 ლარით. დაფინანსებით უკვე ისარგებლა ორმა პაციენტმა, პროგრამა მომავალ წელსაც გაგრძელდება.

ნეტგაზეთის მასალების სხვა გამოცემებში გადაბეჭდვის წესი
ავტორი