Batumelebi | ბათუმის ბიუჯეტი 49 მილიონი ლარით გაიზარდა ბათუმის ბიუჯეტი 49 მილიონი ლარით გაიზარდა – Batumelebi
ნეტგაზეთი • RU

ბათუმის ბიუჯეტი 49 მილიონი ლარით გაიზარდა

2022 წლის ბათუმის ბიუჯეტი დღეს, 26 ნოემბერს, ბათუმის 2017 წლის მოწვევის საკრებულომ ოპოზიციის პროტესტის ფონზე მიიღო. ბოლო წლებში ეს პირველი შემთხვევაა, როცა უკვე ნოემბრის ბოლოს ბათუმის საკრებულომ ბიუჯეტი დაამტკიცა – მაგალითად, გასულ, 2020 წელს საკრებულომ ბიუჯეტი 21 დეკემბერს დაამტკიცა, 2019 წელს – 25 დეკემბერს, 2018 წელს – 27 დეკემბერს და ა.შ. 

ბათუმის მუნიციპალიტეტის 2022 წლის ბიუჯეტი 254 მილიონ 47 ათას 400 ლარია,  რაც 2021 წლის მოქმედ ბიუჯეტზე (204 მილიონ 800 ათას 200 ლარი) მეტია 49 მილიონზე მეტი ლარით.

ბათუმის მერმა, არჩილ ჩიქოვანმა უპრეცედენტო უწოდა ბიუჯეტს.

„ეს არის ბათუმის ისტორიაში უპრეცედენტო ბიუჯეტი, როგორც ხარჯვითი ნაწილით, ასევე აღნიშნული ბიუჯეტი გაზრდილია წინა წლის სასტარტო ბიუჯეტთან 103 მილიონი ლარით, ხოლო კორექტირებულ ბიუჯეტთან – 49 მილიონი ლარით.

ბიუჯეტში ასახულია ყველა ის მიმართულება, რაც ჩვენი ქალაქის სამომავლო განვითარებისათვის, მოქალაქეთა სოციალური პრობლემების მოგვარებისათვის და ქალაქის ნორმალურად ფუნქციონირებისთვის არის საჭირო“ – განაცხადა არჩილ ჩიქოვანმა.

ამავე თემაზე: 

ბათუმის 2022 წლის ბიუჯეტი ძველი მოწვევის საკრებულომ პროტესტის ფონზე დაამტკიცა

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com