Batumelebi | მირდატ ქამადაძემ საკრებულოს სხდომაზე მძაფრსუნიანი ხსნარი დაღვარა – სხდომა შეჩერდა მირდატ ქამადაძემ საკრებულოს სხდომაზე მძაფრსუნიანი ხსნარი დაღვარა – სხდომა შეჩერდა – Batumelebi
ნეტგაზეთი • RU

მირდატ ქამადაძემ საკრებულოს სხდომაზე მძაფრსუნიანი ხსნარი დაღვარა – სხდომა შეჩერდა

„ხელთ მიჭირავს შპრიცი, რომელშიც არის ნივთიერება სრულიად უწყინარი, უბრალოდ აქვს ძალიან ისეთი სუნი, აქ ვეღარ გაჩერდებით… მე ვრჩები აქ“, – განაცხადა დღეს, 26 ნოემბერს, ბათუმის საკრებულოს სხდომაზე ,,ნაციონალური მოძრაობის” წევრმა, მირდატ ქამადაძემ და შპრიციდან ხსნარი დაღვარა დარბაზში.

მირდატ ქამადაძე თანამოაზრეებთან ერთად მიიჩნევს, რომ ბათუმის ძველი საკრებულო ქალაქის ახალ ბიუჯეტს არ უნდა ამტკიცებდეს.

საკრებულოს სხდომა დროებით შეჩერდა. დარბაზი ხალხმა დატოვა, გააღეს ფანჯრები, მირდატ ქამადაძე კი დარბაზიდან გაიყვანეს.

დღეს, 26 ნოემბერს, ბათუმში საკრებულო სხდომა იმართება. მიუხედავად იმისა, რომ ბათუმს უკვე ჰყავს ახალარჩეული საკრებულო, 2022 წლის ბიუჯეტის დამტკიცებას საკრებულოს ძველი შემადგენლობა აპირებს, რასაც ახალი საკრებულოს ოპოზიცია აპროტესტებს. ამ საკითხს გუშინ, 25 ნოემბერს, საკრებულოს ბიუროს სხდომაზე დაპირისპირება მოჰყვა ძველ და ახალ საკრებულოს წევრებს შორის.

ბათუმის ძველი მოწვევის საკრებულო დღეს ბიუჯეტის განხილვასთან ერთად საკუთარი ხელფასების მომატების საკითხსაც განიხილავს.

ასევე მნიშვნელოვნად იზრდება მერიის თანამშრომლების ხელფასები. თუმცა ყველაზე დიდი ოდენობით – 1000 ლარით ბათუმის არჩეული მერის ხელფასი იზრდება. არჩილ ჩიქოვანი ითხოვს, რომ მისი ხელფასი 5 500 ლარამდე გაიზარდოს. მისი მაკონტროლებლის, საკრებულოს თავმჯდომარის ხელფასი 5060 ლარამდე იქნება.

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com