Batumelebi | „რიჟვაძე, ბოდიში, რომ კიდევ მანდ ხარ“ – „სირცხვილიას“ ბანერი აჭარის მთავრობის სახლთან „რიჟვაძე, ბოდიში, რომ კიდევ მანდ ხარ“ – „სირცხვილიას“ ბანერი აჭარის მთავრობის სახლთან – Batumelebi
RU | GE  

„რიჟვაძე, ბოდიში, რომ კიდევ მანდ ხარ“ – „სირცხვილიას“ ბანერი აჭარის მთავრობის სახლთან

„რიჟვაძე, ბოდიში, რომ კიდევ მანდ ხარ!“ – ამ წარწერით ბანერი გაშალეს დღეს, 25 ნოემბერს, „სირცხვილიას“ აქტივისტებმა აჭარის მთავრობის სახლთან.

„ვნახეთ თორნიკე რიჟვაძის კომენტარი აუდიოჩანაწერებთან დაკავშირებით, რომელიც გუშინ ნაციონალურმა მოძრაობამ გაავრცელა.

კომენტარში რიჟვაძე ამბობდა, რომ ბოდიშს მოახდევინებდა ყველას ბრალდებების გამო. ჩვენ მოვედით რიჟვაძისთვის ბოდიშის მოსახდელად იმისთვის, რომ ის ჯერ კიდევ ამ შენობაში იმყოფება და ჯერ ისევ იკავებს ამ თანამდებობას, რომელსაც არ იმსახურებს“ – გვითხრა თამარ კურატიშვილმა, მოძრაობა „სირცხვილიას“ ბათუმის ორგანიზაციის ხელმძღვანელმა.

გუშინ, 24 ნოემბერს, ბათუმში „ერთიანმა ნაციონალურმა მოძრაობამ“ განაცხადა, რომ ბათუმის ახალი საკრებულოს წევრზე, ნუგზარ ფუტკარაძეზე, ზეწოლას ახდენდნენ, მის მოსყიდვას ცდილობდნენ და ამის დასადასტურებლად აუდიოჩანაწერი გამოაქვეყნა. ენმ-ს განცხადებით, ამ პროცესში უშუალოდ ჩართულნი იყვნენ ასლან აბაშიძის დროინდელი პოლიციელები, ხოლო მათ უშუალოდ ხელმძღვანელობდა დავით რიჟვაძე, აჭარის მთავრობის თავმჯდომარის, თორნიკე რიჟვაძის მამა.

ოპოზიციის ამ განცხადების საპასუხოდ, აჭარის მთავრობის თავმჯდომარემ, თორნიკე რიჟვაძემ განაცხადა, რომ ყველას მოსთხოვს ბოდიშის მოხდას, თუ ჩანაწერებში მისი ოჯახის წევრის სახელი არ ფიგურირებს.

ნუგზარ ფუტკარაძე, რომლის მოსყიდვასაც ცდილობდნენ აუდიოჩანაწერის მიხედვით, ახალი მოწვევის საკრებულოს წევრი იყო „ნაციონალური მოძრაობიდან“. ის 18 ნოემბერს გარდაიცვალა.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com