თამარ კურატიშვილი ადმინისტრაციული წესით დაკავებისთვის პოლიციას უჩივის. საჩივრით „სირცხვილიას“ ბათუმის ორგანიზაციის ხელმძღვანელმა უკვე მიმართა შინაგან საქმეთა სამინისტროს და დაკავების ოქმის გაუქმება მოითხოვა. იმის მიუხედავად, თუ რას გადაწყვეტს შსს, აქტივისტი სასამართლოსთვის მიმართვას აპირებს ზიანის ანაზღაურების მოთხოვნით.
თამარ კურატიშვილი პოლიციელებმა 13 ნოემბრის საღამოს დააკავეს ბათუმში, სუსის ადმინისტრაციულ შენობასთან, როცა ის პერფომანსს – „ყველას დაგვიჭერთ?“ მობილური ტელეფონით იღებდა. აქტივისტს პოლიციელებმა ჯარჯი მელაძემ და რეზო ხარაზმა მოსთხოვეს ვიდეოგადაღების შეწყვეტა. თამარ კურატიშვილმა პოლიციელებს მოსთხოვა განმარტება, რატომ უნდა შეეწყვიტა ვიდეოს გადაღება ქუჩაში, საჯარო სივრცეში. პასუხის გაცემის ნაცვლად, პოლიციელებმა თამარ კურატიშვილი დააკავეს.
ის ოზურგეთში გადაიყვანეს და 43 საათი გააჩერეს წინასწარი დაკავების იზოლატორში. თამარ კურატიშვილი დაახლოებით 5 საათი არ დააკავშირეს ადვოკატს.
ბათუმის საქალაქო სასამართლოში მოსამართლე ირმა ტოგონიძემ თამარ კურატიშვილი გაამართლა როგორც წვრილმანი ხულიგნობის, ასევე პოლიციელების კანონიერი მოთხოვნის დაუმორჩილებლობის ნაწილში.
სასამართლოში საქმის მოგების მიუხედავად, თამარ კურატიშვილი დავის გაგრძელებას აპირებს, რადგან სამართალდამცველებს პასუხი არ უგიათ მისი უკანონო დაკავებისთვის და იმისთვის, რომ 2 დღე-ღამე იზოლატორში უკანონოდ გააჩერეს მაშინ, როცა 12 წლის შვილი გარეთ მარტო დარჩა.
ეს არაა პირველი შემთხვევა, როცა სასამართლოს გადაწყვეტილებით დასტურდება ის, რომ დაკავება უკანონოა. თუმცა, იმის გამო, რომ შესაძლოა უკანონოდ დაგაკავონ და შემდეგ 48 საათი რომელიმე ქალაქის იზოლატორში დაგტოვონ, პასუხს არავინ აგებს – დაკავების კანონიერების გასაჩივრების სამართლებრივი მექანიზმი არ არსებობს.
დაკავების კანონიერების, ასევე დაკავების ვადის გახანგრძლივების ნაწილში საია საკონსტიტუციო სასამართლოში სარჩელის შეტანას აპირებს.
საია-ს იურისტი, მირზა მამულაძე, რომელიც თამარ კურატიშვილის ინტერესებს იცავს, განმარტავს, რომ შსს-თვის მიმართვა დაკავების ოქმის გაუქმების მოთხოვნით კანონით გათვალისწინებული პროცედურის ნაწილია და აქტივისტი სასამართლოს ზიანის ანაზღაურების მოთხოვნით იმ შემთხვევაშიც მიმართავს, თუკი შსს იტყვის, რომ სამართალდარღვევის არარსებობის მიუხედავად, დაკავების ოქმი კანონიერია და ის ძალაში უნდა დარჩეს.
„ასეთი შემთხვევაც არსებობს, როცა სამართალდარღვევა არ დადასტურდა, მაგრამ შინაგან საქმეთა სამინისტრომ დაკავების ოქმის გაუქმებაზე უარი თქვა.
თუკი შსს დაკავების ოქმს გააუქმებს, უფრო მეტი საფუძველი იქნება იმისთვის, რომ ზიანის ანაზღაურება მოვითხოვოთ,“ – გვითხრა მირზა მამულაძემ.
„პოლიციელის მიერ განხორციელებული საპოლიციო ღონისძიება უნდა გამომდინარეობდეს კანონის უზენაესობისა და კანონისმიერი დათქმის პრინციპებიდან… ადმინისტრაციული დაკავება უნდა ემსახურებოდეს ლეგიტიმური მიზნის მიღწევას, უნდა იყოს გამოსადეგი, აუცილებელი და პროპორციული,“ – აღნიშნულია საჩივარში, რომლითაც თამარ კურატიშვილმა შსს-ს მიმართა.
საჩივარში აღნიშნულია ისიც, რომ ადმინისტრაციული დაკავების ვადა – 24 საათი ისე გაახანგრძლივეს კიდევ 24 საათით, რომ სამართალდამცველებს ამის საჭიროება არ დაუსაბუთებიათ.
„განსახილველ შემთხვევაში პოლიციის თანამშრომლებმა თავისუფლება აღმიკვეთეს აბსოლუტურად უსაფუძვლოდ, უფრო მეტიც, დაკავების 24 – საათიანი ვადის ამოწურვის შემდგომ, დამატებით გამიხანგრძლივეს 24 საათით ადმინისტრაციული პატიმრობა ისე, რომ საამისო საკანონმდებლო საფუძველი არ ყოფილა. ამდენად, ადმინისტრაციული დაკავების ოქმი გამოცემულია უკანონოდ და დაუსაბუთებლად,“ – მიიჩნევს თამარ კურატიშვილი.
საია-ს იურისტი მირზა მამულაძე აღნიშნავს იმასაც, რომ ახლა განსაკუთრებით საინტერესოა სასამართლოს მიდგომა იმ ფონზე, როცა ადმინისტრაციული დაკავების ვადა გახანგრძლივდა, ხოლო იმ წლებში, როცა დაკავების მაქსიმალური ვადა 12 საათი იყო, თბილისის საქალაქო სასამართლომ 2016 წლის ივლისში მოქალაქისთვის ზიანის ანაზღაურება საჭიროდ არ მიიჩნია.
„სასამართლომ თქვა, რომ უკანონო დაკავება ზიანის ანაზღაურების საფუძველი არ არისო,“ – დასძინა მირზა მამულაძემ.
