Batumelebi | 45 ტურისტი დაიღუპა ბულგარეთში ავტობუსში გაჩენილი ხანძრის შედეგად 45 ტურისტი დაიღუპა ბულგარეთში ავტობუსში გაჩენილი ხანძრის შედეგად – Batumelebi
ნეტგაზეთი • RU

45 ტურისტი დაიღუპა ბულგარეთში ავტობუსში გაჩენილი ხანძრის შედეგად

45 ადამიანი დაიღუპა, მათ შორის 12 ბავშვი, ბულგარეთში, ავტობუსში გაჩენილი ხანძრის შედეგად. ამის შესახებ „როისტერსი“ წერს.

გამოცემის ცნობით, ავტობუსში ძირითადად მაკედონიელი ტურისტები იმყოფებოდნენ.

7-მა ადამიანმა ცეცხლწაკიდებული ავტობუსიდან გადმოხტომა მოახერხა, ისინი კლინიკაში გადაიყვანეს და მათი ჯანმრთელობის მდგომარეობა სტაბილურია.

ბულგარეთის შს სამინისტრო აცხადებს, რომ დაიღუპა 45 ადამიანი და ეს ყველაზე საზარელი ავარიაა ბულგარეთის ისტორიაში.

ბულგარეთის შს მინისტრის, ბაიკო რეშკოვის თქმით, ადამიანები ავტობუსში დაიწვნენ. „საზარელი სურათია, ასეთი არასდროს მინახავს“ – განაცხადა მინისტრმა.

ავტობუსში ხანძრის გაჩენის მიზეზი უცნობია, თუმცა, ვარაუდობენ, რომ ავტობუსი შეეჯახა შლაგბაუმს ან ხანძრამდე, ან ხანძრის გაჩენის შემდეგ.

ავარია ბულგარეთის დედაქალაქიდან დაახლოებით 45 კილომეტრის დაშორებით მოხდა, ღამის 2 საათზე. ტურისტები მაკედონიაში ბრუნდებოდნენ სტამბოლში ექსკურსიის შემდეგ.

__________

ფოტო: ევროპის პრესფოტო სააგენტო. EPA/VASSIL DONEV

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com