Batumelebi | ბათუმში 33 ბავშვს მკურნალობენ კოვიდზე – „ტენდენცია არის მატებისკენ“ ბათუმში 33 ბავშვს მკურნალობენ კოვიდზე – „ტენდენცია არის მატებისკენ“ – Batumelebi
RU | GE  

ბათუმში 33 ბავშვს მკურნალობენ კოვიდზე – „ტენდენცია არის მატებისკენ“

7 ოქტომბრის მდგომარეობით, იაშვილის სახელობის ბათუმის დედათა და ბავშვთა ცენტრალურ ჰოსპიტალში 33 ბავშვს მკურნალობენ კოვიდზე. ინფიცირებული ბავშვების ასაკი 2-დან 13 წლამდეა.

„დილის  მდგომარეობით 33 ბავშვი იყო კლინიკაში. სამწუხაროდ, ტენდენცია არის მატებისკენ, რადგან აქამდე თუ გვყავდა 15-17 პაციენტი, ახლა უკვე ეს რიცხვი გაორმაგდა,“- ამბობს ჰოსპიტლის დირექტორი თამარ ბახტაძე.

მისი თქმით, კოვიდინფიცირებული ბავშვების ასაკი დაახლოებით 28 თვიდან 13 წლამდეა. „უფრო მეტად კი 7-8 წლამდე ასაკის ბავშვები სჭარბობენ,“ – ამბობს თამარ ბახტაძე.

მისივე თქმით, წინა თვეებში უფრო ხშირი იყო ახალშობილების ინფიცირების შემთხვევა, თუმცა ბოლო პერიოდში ეს რიცხვი მნიშვნელოვნად შემცირდა.

როგორც კლინიკაში გვითხრეს, ჰოსპიტალში მყოფი კოვიდინფიცირებული ბავშვების მდგომარეობა ამ დროისთვის სტაბილურია.

„მხოლოდ ერთი ბავშვია რეანიმაციაში, სხვების მდგომარეობა საშუალო სიმძიმისაა,“ – ამბობს თამარ ბახტაძე.

____________

ფოტო: იაშვილის სახელობის ბათუმის დედათა და ბავშვთა ცენტრალური ჰოსპიტალი, კოვიდკლინიკა

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com