მთავარი,სიახლეები

გახარია „იმედის“ ჟურნალისტებს: შევდივარ თქვენს მდგომარეობაში

23.09.2021 • 3208
გახარია „იმედის“ ჟურნალისტებს: შევდივარ თქვენს მდგომარეობაში

ყოფილი პრემიერ-მინისტრი, პარტია „საქართველოსთვის“ ლიდერი გიორგი გახარია ეხმიანება გუშინ, 22 სექტემბერს ტელეკომპანია „იმედის“ ეთერში გასულ სიუჟეტს, რომელშიც ნაჩვენები იყო, ჟურნალისტი როგორ ცდილობდა ავსტრიაში, ვენის ქუჩებში გადაემოწმებინა გახარიას მიერ ჩატარებული ნარკოტესტის ნამდვილობა.

„მივმართავ ტელეკომპანია „იმედის“ პოლიტიკურ ხელმძღვანელობას, გავიგე, რომ ხელისუფლების მიერ დაგეგმილ და ამუშავებულ პროპაგანდისტულ კამპანიაში ტყუილებით ჩაერთეთ. აღარ ვსაუბრობ ცალმხრივ გაშუქებასა და იმაზე, რომ ამდენი ხნის განმავლობაში უარს ამბობთ ეთერში ჩემს მოწვევაზე, აქ უკვე ვსაუბრობ იმაზე, რომ გუშინ ავსტრიიდან ალაპარაკეთ ჟურნალისტს ის, რისი დამადასტურებელი ერთი ფაქტი, ერთი წინადადებაც კი, ვერ წარმოადგინეთ და პირდაპირ წამომიყენეთ ბრალდება. იქვე თქვით, რომ ძალიან გაინტერესებდათ, ამაზე რა პასუხს გაგცემდით.

ამიტომ, კიდევ ერთხელ მოგმართავთ, პატივი ვცეთ თქვენს მაყურებელს, ჩვენს მოქალაქეებს და მივცეთ შესაძლებლობა პირადად ჩემგან პირდაპირ ეთერში მოისმინონ ეს პასუხი.

ამისთვის მზად ვარ, თქვენს არხზე დავჯდე პირდაპირ ეთერში, სადაც ექსკლუზიურად მოგიყვებით ნარკოტესტთან დაკავშირებით ოცნების მიერ დაგეგმილ სპეცოპერაციაზე და ასევე, ავსტრიაში ჩემი ერთდღიანი ვიზიტის შესახებ.

აქვე, მინდა ვუთხრა ტელეკომპანია „იმედის“ ჟურნალისტებს – გიდასტურებთ ჩემს პატივისცემას და შევდივარ თქვენს მდგომარეობაში“ – წერს გახარია ფეისბუქზე.

„ქართული ოცნების“ ლიდერმა, ირაკლი კობახიძემ არაერთხელ განაცხადა, რომ გიორგი გახარია კოკაინის მომხმარებელია. გახარიამ ავსტრიაში, ვენაში ჩატარებული ნარკოტესტის პასუხი გამოაქვეყნა იმის დასტურად, რომ ნარკოტიკების მომხმარებელი არ არის.

ამავე თემაზე: 

კობახიძის თქმით, გახარიამ კოკაინის მოხმარება „ოცნების“ დატოვების შემდეგ დაიწყო

გადაბეჭდვის წესი


ასევე: