„ვის შესახებაც მაქსიმუმი გავიგეთ, გამოეთიშებიან პროსახელისუფლებო კამპანიას და ოპოზიციას მიემხრობიან,“ – მიიჩნევს თეოლოგი მირიან გამრეკელაშვილი. მას ინტერვიუს დროს ვკითხეთ, როგორ აისახება სავარაუდოდ სუსიდან გაჟონილი ფაილები ხელისუფლებისა და სასულიერო პირების ურთიერთობაზე. თეოლოგს ეჭვი არ ეპარება, რომ პირადი ცხოვრების ამსახველი ვიდეომასალებიც არსებობს.
„ბათუმელებმა“ მირიან გამრეკელაშვილს ჰკითხა, რა გავლენა ექნება სავარაუდოდ სუსიდან გამოჟონილ ფაილებს პოლიტიკურ პროცესებზე.
- ბატონო მირიან, თქვენი დაკვირვებით, ვის ინტერესებში შედიოდა წინასაარჩევნო პერიოდში სავარაუდოდ სუსის ფაილების გასაჯაროება?
ცოტა ძნელი გასარკვევია ეს. როგორც ამ ფაილების გამომტანი პიროვნების წერილიდან ჩანს, არაა გამორიცხული, ეს იყოს მართლაც უბრალოდ ადამიანური ისტორია პიროვნებისა, რომელიც იყო მიჩენილი მისაყურადებლად ეკლესიაზე და მან საბოლოოდ ეს ვერ დაიტია, მიხვდა, რომ უსამართლობას ემსახურებოდა, გამოვიდა, გამოიტანა ინფორმაცია და თავი მოიკლა. ასეთი რამეებიც ხდება ხოლმე. შესაძლოა, რომ ამ ფაილების გამომტანს ჰქონოდა პოლიტიკური სიმპათიებიც. ამ ვითარებაში ფაილების გასაჯაროვება უფრო აჩვენებს იმას, რომ არსებობდა პოლიტიკური გათვლაც.
- ყველა ეს ფაილი დაკავშირებულია ეკლესიასთან. რა პოლიტიკური გათვლა შეიძლება იყოს სასულიერო პირების მიზანში ამოღება?
თუ გვაქვს გარკვეული ინფორმაცია იმაზე, თუ როგორ მუშაობენ ჯაშუშები, ვიცით, რომ ჯაშუში, როგორც წესი, მიჩენილი კონკრეტულ სეგმენტზე. შესაძლებელია, რომ ვინც ეს მასალები გამოიტანა, მას ხელთ ჰქონდა მხოლოდ ამ სეგმენტზე არსებული მასალები, შესაძლოა ის მიმაგრებული იყო საეკლესიო პირების მოსმენაზე. ფაქტია, რომ ეს მასალები აქვთ აკურატულად დამუშავებული ფაილების დასახელებით და ასე შემდეგ. აქ საეკლესიო ტერმინებსაც ვხდებით, მაგალითად, „მრუშობა“ ჰქვია ერთ-ერთ ფაილს, მედიის თანახმად. ფაილები სავარაუდოდ დიდწილად შეიცავენ საჯარო ან ნახევრად საჯარო ინფორმაციასაც. ბევრია ე.წ. ღია ხაზით მონათხრობი ამბებიც, მათ შორის, მედიაში გაჟღერებული ცნობებიც, რომელიც უბრალოდ დააარქივეს. ეს ყველაფერი აჩენს ეჭვს, რომ არსებობს სხვა, უფრო მნიშვნელოვანი ინფორმაციაც.
ამ ეტაპზე სასულიერო პირების რეაქცია არის იგნორი. ამბობენ, რომ ეს ყველაფერი არის ჭორი და მონაგონი. მათ არ აქვთ შიში, რომ ეს გახდება მრევლის პროტესტის მიზეზი. როგორც საქართველოს მთავრობამ გამოშიგნა თვითმმართველობა ყველგან და ხალხი პოლიტიკური პროცესისგან გათიშა, იგივე პროცესი მიმდინარეობს ეკლესიაშიც. მან ფსონი დადო არა მრევლის რიგით წევრებზე, არამედ ნახევრად ლეგალური საქმიანობით გამდიდრებულ ელიტურ ოჯახებზე, ადგილობრივ ბიზნესმენებზე, ოლიგარქებზე, ჩინოვნიკებზე. ეს ხალხია ეკლესიის შემოსავლის ძირითადი წყარო. ვინაიდან ადგილობრივი მრევლი ფინანსურად არ არის საინტერესო, მათ ანგარიშს საერთოდ არც უწევენ.
ერთადერთი, რასაც შეიძლება აღშფოთება მოჰყვეს, ეს არის კადრები. სადღეისოდ ჩვენ ვართ ვიზუალურ ეფექტებზე აგებული კულტურა და საზოგადოება.
- უშვებთ, რომ არსებობს კადრები ამ ფაილების პარალელურად, რაც შეიძლება ასევე გაავრცელონ?
ფაილები, რაც გასაჯაროვდა, ძირითადად არის პირადი ცხოვრების ამსახველი ამბები, სასიყვარულო სამკუთხედებია გაშიფრული და გასაგებია, რომ ამას შესაძლოა კადრებიც ახლდეს.
ტრაგედია არის ის, რომ ჩამოვყალიბდით პირადი ცხოვრების ტერორზე აწყობილ ყოფით კულტურად, რაც ცალსახად საშინელებაა. ვფიქრობ, თუ ადამიანებს, მათ შორის, იერარქებს აქვთ სექსი, ეს ცუდი კი არა, კარგია. ეს ნიშნავს, რომ ცხოვრებაში ერთ რაღაცას მაინც აკეთებენ სწორად და მთელი სამყარო არ სძულთ.
გამოდის, რომ ვიღაც მაინც უყვართ და ვიღაცას ისინიც უყვარს, მაგრამ რაც ამ ფაილებიდან ჩანს, ეს სექსუალური თავგადასავლებიც აგებულია იერარქიულ და ეკონომიკური სარგებლიანობის პრინციპზე. ეს არ არის გულწრფელი სიყვარულის გამოხატვა, რომელსაც შეიძლება თანაუგრძნო… პირიქით, როგორც ჩანს, სასულიერო იერარაქს ჰყავს საყვარელი, შემდეგ ის სძალავს თანხას ან ელის დაწინაურებას იერარქიულ კიბეზე და ა.შ., ანუ ამ მხრივაც კი სრულიად გულისამრევი და გაუბედურებული ამბავია.
ჩვენს იერარქებში გულწრფელი სიყვარულისა და ეროსის ადგილიც კი არ არის.
- რა შეიძლება მოჰყვეს კადრების გავრცელებას? შესაძლოა იგივე რეაქცია მივიღოთ, რაც, მაგალითად, ციხის ცნობილი კადრების შემთხვევაში მოხდა?
თუ კადრებიც გავრცელდება, მაშინ საპატრიარქოს მოუწევს რეაგირება, რასაც ამ ეტაპზე არ აპირებს. ასევე უბრალოდ ადამიანებსაც სავარაუდოდ ექნებათ რეაქცია ამაზე, თუმცა გააჩნია, რა დევს კადრებში. თუ გახსოვთ, ციხის კადრებამდეც ვრცელდებოდა ინფორმაცია პატიმრების წამებაზე წერილობით, სახალხო დამცველის ანგარიშებში მოხვდა არაერთი ფაქტი მაგალითად, მაგრამ საზოგადოებას რეაქცია ჰქონდა მხოლოდ კადრებზე.
ახლაც გააჩნია, რა არის კადრებში: თუ აჩვენებენ, რომ იერარქს აქვს სექსუალური თანაცხოვრება დედაოებთან ან მორჩილებთან, ამაზე არავის არ ექნება რეაქცია. ეს ყველამ ისედაც იცის ფაქტობრივად. როგორც ჩანს, მოთვალთვალეთა მიერ სასულიერო პირების იდენტიფიცირება არის გაკეთებული ჰომოსექსუალობის მიხედვითაც. ვერავინ დამაჯერებს, რომ შესაბამისი კადრებიც არ აქვთ. თუმცა საზოგადოებას შეიძლება სასულიერო პირების გეი ურთიერთობების ან პედოფილიის ამსახველ კადრებზე ჰქონდეს რეაქცია.
- თქვენი აზრით, რამდენად შეცვლის ეს ფაქტი სასულიერო პირების ურთიერთობას ხელისუფლებასთან? მათ ექნებათ შიში, რომ ახალი, უფრო დიდი „კომპრომატი“ არ დაიდოს, თუ დაუპირისპირდებიან ხელისუფლებას, რომელმაც მორალურად დააზიანა?
შესაძლოა წვრილი სამღვდელოება, ვისაც აქამდე ეგონა, რომ არ უსმენდნენ და უყურადებდნენ, განაწყენდეს, მაგრამ დიდმა იერარქიამ ისედაც იცის, რომ მათ უსმენენ. თუ უფრო მეტი ფაქტი გასაჯაროვდება, მაშინ მათ თავისუფლად უნდა იგრძნონ, წესით, თავი.
წინა ხელისუფლებაც ყველას უსმენდა, მაგრამ ეკლესიასთან მიმართებაში მეტწილად ემხრობოდა მათი მოთაფვლის, მოსყიდვის პოლიტიკას. ამ ხელისულებამ განიზარახა ეკლესია იაფფასიან მსახურად გაიხადოს და ეს გამოუვიდა კიდეც. სასულიერო იერარქიები ადრე პარტიულ ყრილობაზე წასვლას თაკილობდნენ, დღეს კი, მთელი სამღვდელოება ეპისკოპოსიდან დაწყებული, მცირე ხარისხის სამღვდელოებით დასრულებული, ესწრებიან პარტიულ ყრილობებს, მათ შორის, ისეთი სასულიერო პირები, რომლებიც, როგორც ვიცი, არ არიან „ქართული ოცნების“ მხარდამჭერები.
ეს იმას ნიშნავს, რომ „ქართული ოცნება“ ფსონს დებს არა მოთაფვლაზე და მოსყიდვაზე, არამედ დაშინებაზე, მაგრამ თუ დასაშინებელი აღარაფერია, მაშინ ისინი გათავისუფლდებიან.
- გამოდის, რომ „ოცნებას“ არ აწყობდა ამ ფაქტების გასაჯაროება?
კი, ეს არ აწყობდა ხელისუფლებას, ეს იყო გაჟონვა „ოცნების“ კონტროლს მიღმა.
- ოპოზიციას რატომ შეიძლება აწყობდეს ამ ფაილების გასაჯაროება?
ოპოზიცია დიდად არ განსხვავდება ამ მხრივ ხელისუფლებისგან. ცნობილია, რომ ეკლესიის მიმართ კრიტიკული დამოკიდებულება აქვთ მხოლოდ „რესპუბლიკელებს“ და კიდევ სულ რამდენიმე პოლიტიკოსს.
საქმე ის არის, რომ ბოლო დროს პოლიტიკურ თამაშში „ოცნებამ“ ეკლესია სრული ძალით ჩართო.
შესაბამისად, გამორიცხული არ არის, ოპოზიციის ხელი იკვეთებოდეს ამ პროცესში…. ჩემი აზრით, ახლა სამღვდელოების ნაწილი, ვისზეც ალბათ კიდევ ბევრი რამ არის გასაგები, კიდევ უფრო მეტი გააფთრებით ჩაერთვება პროსახელისუფლებო საარჩევნო პროცესში, ხოლო ვის შესახებაც მაქისიმუმი გავიგეთ, გამოეთიშებიან სამთავრობო კამპანიას და სავარაუდოდ ოპოზიციას მიემხრონ. ამ მხრივ თუ შევხედავთ, ეს ყველაფერი შესაძლოა უფრო ოპოზიციის წისქვილზე ასხამდეს წყალს.
- ამ ფაილების მოპოვება ოპოზიციიდან ვის შეეძლო ყველაზე მეტად, თქვენი აზრით?
არ ვიცი. ლოგიკურია, რომ წინა ხელისუფლებაში მყოფი ადამიანებიც შეეცდებოდნენ სუსის აგენტების გადმობირებას, მაგრამ ასე რომ ყოფილიყო, ამას გამოიყენებდა მაშინ წინა არჩევნებზე, რომელიც უფრო დიდი პოლიტიკური მნიშვნელობისა იყო.
- გახარია?
საინტერესოა. არ არის გამორიცხული, რადგან თვითონ გახარია იყო ამ სტრუქტურების შეფი ახლო წარსულში და ესეც დასაშვებია.
- გათვლა რა შეიძლება იყოს: თუ სასულიერო იერარქიები აღარ იქნებიან ხელისუფლების სამსახურში, ამით რა სარგებელს მიიღებს ოპოზიცია?
აქამდე არსებობდა უსიტყვო შეთანხმება, რომ საპატრიარქოს გავლენებს ყველა პარტია ინაწილებდა. იერარქიის ცენტრი იყო სახელისუფლებო, მაგრამ პატარა იერარქები, ეპისკოპოსები საკუთარ სიმპათიებს გამოხატავდნენ. ყველა პარტიას მხარდაჭერის თავისი წილი ჰქონდა.
მოცემულ მომენტში ხელისუფლებამ მთლიანად გადაყლაპა საპატრიარქო და ეკლესია, როგორც მხარდაჭერის რესურსი. ამ ეფექტის გაუვნებელყოფა ყველა პარტიას უნდა აწყობდეს წესით, რადგან ხელისუფლებას გამოეცლება ერთ-ერთი მძლავრი მხარდამჭერი და ოპოზიცია გამოთავისუფლებული რესურსის ათვისებას შეეცდება.
ცოტა ნაწყენიც ვარ, რომ არ მოვხდი ამ ჩანაწერებში, როგორც თეოლოგი (ხუმრობით). ალბათ იმიტომ არ მოვხვდი, რომ ყოველთვის პირდაპირ ვამბობ სათქმელს და სექსუალური ცხოვრებითაც მათთვის საინტერესო ალბათ არ ვარ. მეორე მომენტია ის, რომ ევროპული ანგარიშები მაქვს და გერმანიაში ვცხოვრობ. აქ ასე იოლი არაა საქართველოდან ვინმემ მომიყურადოს. გერმანიაში განსაკუთრებით რთულია პირად ცხოვრებაზე წვდომა და რეაულურად დიდი შიში აქვთ, რომ პირადი მონაცემები შეიძლება ვინმემ დევნისთვის გამოიყენოს.
- შეიძლება თუ არა ამ ფაილების გასაჯაროება რაიმე ფორმით აწყობდეს რუსეთს?
როგორც გასაჯაროებული მასალებიდან ჩანს, ფაილებში სხვადასხვა ინფორმაციაა მოცემული რუსეთის შესახებ, ვისთან თანამშრომლობენ სასულიერო პირები, თუმცა ეს ცალკე საკვლევი თემაა… რეალურად ჩვენ გვაქვს საპატრიარქო და გვყავს ხელისუფლება, რომელიც ძირს უთხრის და საფრთხეს უქმნის ჩვენი სახელმწიფოს სუვერენიტეტს. ეს არის ყველაზე მნიშვნელოვანი.
ჩვენ ვართ რუსეთის პოლიტიკური აგენტების ხელში ეკლესიური თვალსაზრისით. ამას სუსიც ამბობს და მეტი ვინღა უნდა გვითხრას? ერთადერთი, რაშიც შეიძლება უშუალოდ აწყობდეს რუსეთის ეს პროცესი, არის მეუფე შიო, რომელზეც ამ ფაილებში სავარაუდოდ ბევრი არც არაფერია ნათქვამი. შესაძლოა, რუსეთს აწყობდეს იმის ჩვენება, რომ ეკლესიის შიგნით “უმწიკვლო“ მხოლოდ პატრიარქის მოსაყდრეა, ხოლო ყველა დანარჩენი ყველა გაფუჭებულია.
- პატრიარქზეც არაფერია ნათქვამი ამ ჩანაწერებში
არ არის გამორიცხული პატრიარქის და მისი უშუალო გარემოცვის მიმართ არსებობდეს მიყურადების გაცალკევებული განყოფილება და ამ მხრივ ცალკე ფაილები ექნება სუსს, რომელიც გასაჯაროების ჟამს ჯერ კიდევ ელოდება.
_______________
რა ხდება?
13 სექტემბერს საქართველოში მედიასაშუალებებმა მიიღეს ბმული ჰაკიმ ფაშას სახელით და სათაურით – „სუსის კომპრომატი საპატრიარქოს წინააღმდეგ“.
ბმულზე ასობით ფაილია, რომლებშიც მოცემულია პირადი ინფორმაცია მართლმადიდებელი სასულიერო და სამოქალაქო პირების საჯარო და პირადი ცხოვრების, სექსუალური კავშირების შესახებ. ინფორმაციას თან ერთვის ფოტოები, პირადი ნომრები, ტელეფონის ნომრები.
სისტემურობიდან და შინაარსიდან გამომდინარე, ფაილები, სავარაუდოდ, სუსიდან არის გაჟონილი და 2014 წლიდან 2021 წლის ჩათვლით თარიღდება.
ზოგიერთი ცნობა შეიცავს სისხლის სამართლის დანაშაულის ნიშნებს, მათ შორის, საუბარია სასულიერო პირების მხრიდან სექსუალური კონტაქტის დამყარებაზე არასრულწლოვნებთან, ქრთამის აღებაზე პატიმართა შეწყალებაზე შუამდგომლობის სანაცვლოდ და სხვა.
