Batumelebi | რა უნდოდა სუს-ში აჭარის ფინანსთა მინისტრს? რა უნდოდა სუს-ში აჭარის ფინანსთა მინისტრს? – Batumelebi
RU | GE  

რა უნდოდა სუს-ში აჭარის ფინანსთა მინისტრს?

აჭარის ფინანსთა და ეკონომიკის მინისტრი ჯაბა ფუტკარაძე დღეს, 30 აგვისტოს, სახელმწიფო უსაფრთხოების სამსახურში [სუს-ში] მივიდა. სუს-ის პრესცენტრის ინფორმაციით, მინისტრი არ გამოუკითხავთ და მას მხოლოდ ერთ საქმეზე „ინფორმაცია გააცნეს“.

„ჯაბა ფუტკარაძე არ გამოუკითხავთ, სხვა ინფორმაცია არ გვაქვს“, – გვიპასუხეს აჭარის ფინანსთა და ეკონომიკის სამინისტროს პრესცენტრში. აქ არც ის დაადასტურეს, რომ ჯაბა ფუტკარაძე სუს-ში იმყოფებოდა.

სუს-ის პრესცენტრის ინფორმაციით კი, ჯაბა ფუტაკარაძეს სუს-ში ინფორმაცია გააცნეს ქობულეთში რამდენიმე თვის წინ ქრთამის აღების საქმეზე.

ქრთამის აღების ფაქტზე სუს-მა ქობულეთის საკუთრების უფლების აღიარების კომისიის თავმჯდომარე, ვიტალი ქარცივაძე 2021 წლის 18 მარტს დააკავა. მაშინ სუს-მა ინფორმაცია გაავრცელა, რომ ვიტალი ქარცივაძემ მიწის კონკრეტული ნაკვეთის საკუთრებაში რეგისტრაციის სანაცვლოდ ქრთამის სახით 10 ათასი აშშ დოლარი მოითხოვა, ხოლო 2 ათასი აშშ დოლარი წინასწარ აიღო.

სუს-ის პრესცენტრში დღეს განმარტეს, რომ ამ საქმეში მოწმეებმა დაასახელეს ჯაბა ფუტკარაძეც, რომელიც საბოლოოდ არ გამოუკითხავთ და არც დღეს ჰქონია გამოძიებას მინისტრთან კითხვები.

რას გულისხმობს „ინფორმაციის გაცნობა“ და რატომ ჩათვალა საჭიროდ სუს-მა, რომ მინისტრისთვის, რომელსაც საქმეში არანაირი სტატუსი არ აქვს, ინფორმაცია უნდა გააცნოს? – სუს-ის პრესცენტრში მოკლედ მხოლოდ ის გვითხრეს, რომ მსგავსი პროცედურა დასაშვებია.

„საქმის მასალებს, როგორც წესი, აცნობენ დაზარალებულებს,“ – ამბობს საია-ს იურისტი, პაატა დიასამიძე, თუმცა ის დასძენს, რომ მასაც სმენია მსგავსი პრაქტიკის შესახებ, როცა გამონაკლის შემთხვევებში საქმის მასალებს დაინტერესებულ პირებს აცნობენ და ეს საგამოძიებო ორგანოს კეთილ ნებაზეა დამოკიდებული.

ნეტგაზეთის მასალების სხვა გამოცემებში გადაბეჭდვის წესი
ავტორი