ბათუმის საჯარო ბიბლიოთეკამ მუშაობა 4 სექტემბრამდე შეაჩერა. მიზეზი ეპიდემიოლოგიური სიტუაცია და კორონავირუსის მზარდი სტატისტიკაა.
საჯარო ბიბლიოთეკის დირექტორის, თეონა ბერიძის თქმით, ამ ეტაპზე მუშაობა შეჩერებული აქვს სამკითხველო დარბაზს და აბონემენტთა მომსახურების განყოფილებას. თუმცა ადმინისტრაცია მუშაობს.
„ბიბლიოთეკა გადადის დისტანციურ რეჟიმზე. დახურულია სამკითხველო დარბაზი. ადმინისტრაცია მუშაობს, მაგრამ უშუალოდ მკითხველზე მომსახურებისგან 4 სექტემბრამდე ვიკავებთ თავს.
გაცემული წიგნების დაბრუნება ჩვეულებრივ უწყვეტ რეჟიმში მიმდინარეობს. გვაქვს იმის შესაძლებლობა, რომ უკან დაბრუნებული წიგნი დავიტოვოთ. თუკი გატანის მსურველი არის ვინმე, შეუძლია ასევე მოთხოვნა დატოვოს, დავუკავშირდებით და კონკრეტულ დროს შევატყობინებთ, როდესაც შეძლებს მოცემული წიგნის გატანას,” – უთხრა “ბათუმელებს” თეონა ბერიძემ.
მისივე თქმით, მართალია, ამ დროისათვის ბიბლიოთეკის თანამშრომლები ჰოსპიტალიზებული არ არიან, მაგრამ კლინიკებში იმყოფებიან თანამშრომელთა ოჯახის წევრები. ამასთანავე, ბიბლიოთეკის ზოგიერთი თანამშრომელი ასაკის გამო რისკჯგუფშია. სწორედ ამიტომ ადმინისტრაციამ მუშაობის შეჩერების გადაწყვეტილება მიიღო.
