Batumelebi | აუქციონები ბათუმში გმირთა ხეივნის მიმდებარე ნაკვეთებზე აუქციონები ბათუმში გმირთა ხეივნის მიმდებარე ნაკვეთებზე – Batumelebi

აუქციონები ბათუმში გმირთა ხეივნის მიმდებარე ნაკვეთებზე

„სამინისტრო გამოთქვამს მზადყოფნა, მოთხოვნის შემთხვევაში, ელექტრონულ აუქციონში გამარჯვებულ პირებს გაუწიოს მოქმედი კანონმდებლობით გათვალისწინებული ყველა შესაბამისი დახმარება განაშენიანების ინტენსივობის კოეფიციენტის (K-2) გაზრდასთან დაკავშირებით, შენობათა დასაშვები მაქსიმალური სიმაღლეების გათვალისწინებით,“ – ასეთი შენიშვნით აჭარის ფინანსთა და ეკონომიკის სამინისტრომ ბათუმში სამ მიწის ნაკვეთზე პირობებიანი აუქციონი გამოაცხადა.

მიწის ნაკვეთები ფიროსმანის ქუჩის მიმდებარედ, გმირთა ხეივანთან მდებარეობს. აუქციონების პირობების თანახმად, საპროექტო ობიექტების საორიენტაციო სიმაღლეებია – 100, 110 და 140 მეტრი [±3 მ].

აუქციონზე გამოტანილი სამი მიწის ნაკვეთის საერთო ფართობია 10 985 კვ/მ, ხოლო გასაყიდი საწყისი ფასი ჯამში 1 660 000 აშშ დოლარი.

123

 

ერთ ნაკვეთზე 9 300 000 აშშ დოლარის ინვესტიცია უნდა ჩაიდოს, მეორე ნაკვეთზე – 11 674 000 აშშ დოლარის, ხოლო მესამე ნაკვეთის შემთხვევაში – 10 700 000 აშშ დოლარის ინვესტიცია.

სამივე აუქციონი 2016 წლის პირველ მარტს უნდა დასრულდეს.

აუქციონზე გამოტანილ ნაკვეთებზე მრავალფუნქციური შენობა- ნაგებობები უნდა განთავსდეს. უნდა მოეწყოს სასტუმრო, ჰიპერმარკეტი, გასართობი ცენტრი, ავტოსადგომი, სხვა საზოგადოებრივი და კომერციული დანიშნულების ფართობები, ასევე შეზღუდული შესაძლებლობების მქონე პირთა გადაადგილებისათვის ადაპტირებული გარემო. მომავალ ინვესტორებს ევალებათ ასევე საქართველოს მოქალაქეების დასაქმებაც.

ზემოთ აღნიშნული ნაკვეთების მომიჯნავედ [ტ. აბუსერიძის ქ. N15/ფიროსმანის ქ. N5-ში მდებარე] 2935 კვ.მ მიწის ნაკვეთი აჭარის ფინანსთა და ეკონომიკის სამინისტრომ გასულ წელს განმეორებით პირობებიან აუქციონზე 463 000 აშშ დოლარად გაყიდა. შემსყიდველი კომპანია „DAR BUILDING“-ია, რომელმაც „ხელშეკრულების გაფორმებიდან 6 თვის ვადაში მრავალფუნქციური შენობა-ნაგებობის [სასტუმრო – არანაკლებ 50 ნომერი, საცხოვრებელი აპარტამენტები, მიწისქვეშა ავტოსადგომი არანაკლებ მიწის ნაკვეთის საპროექტო განაშენიანების [K-1] ფართობისა… საპროექტო დოკუმენტაციის დამუშავება, მშენებლობის ნებართვის მიღება და საკუთრებაში გადაცემული მიწის ნაკვეთიდან არანაკლებ 1800 და არაუმეტეს  2054,5 კვ.მ ფართობზე  მშენებლობის დაწყება“ უნდა უზრუნველყოს. ნასყიდობის ხელშეკრულება კომპანიასთან 2015 წლის 12 აგვისტოს გაფორმდა. შესაბამისად, 12 თებერვლისთვის კომპანიას მშენებლობა დაწყებული უნდა ჰქონოდა, თუმცა ჯერ ტერიტორია შემოსაზღვრული არ არის და საინფორმაციო დაფაც ამ ნაკვეთზე მდებარე ხეზეა მიჭედებული.

საინფორმაციო დაფა „DAR BUILDING“-ის მიერ შესყიდულ ტერიტორიაზე

საინფორმაციო დაფა „DAR BUILDING“-ის მიერ შესყიდულ ტერიტორიაზე

საინფორმაციო დაფა „DAR BUILDING“-ის მიერ შესყიდულ ტერიტორიაზე, რომელიც დიდთოვლობისას წაიქცა

საინფორმაციო დაფა „DAR BUILDING“-ის მიერ შესყიდულ ტერიტორიაზე, რომელიც დიდთოვლობისას წაიქცა

 

 

 

 

 

 

 

 

აუქციონის პირობების თანახმად, „DAR BUILDING“-მა „ხელშეკრულების გაფორმებიდან 40 თვის ვადაში უნდა უზრუნველყოს მრავალფუნქციური შენობა-ნაგებობის დასრულება და ექსპლუატაციაში შეყვანა. ექსპლუატაციაში შეყვანიდან 6 თვის განმავლობაში შენობა-ნაგებობის ნაწილში,  არანაკლებ 1000 კვ.მ ფართობზე საზოგადოებრივი კვების ობიექტ(ებ)ის [მათ შორის, სამინისტროსთან შეთანხმებით მოეწყოს ერთ-ერთი მაინც შემდეგიდან: „ლაუნჯი“ – ბარი, ჩაის სახლი, ყავის სახლი] და გასართობი ცენტრ(ებ)ის [მათ შორის, ბოულინგ ცენტრი] მოწყობა. აღნიშნულ პროექტში არანაკლებ 7 000 000 აშ  დოლარის ექვივალენტი ლარის ინვესტიციის განხორციელება“.

განაშენიანება გმირთა ხეივნის მიმდებარედ [მაკეტი]

განაშენიანება გმირთა ხეივნის მიმდებარედ [მაკეტი]

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com