„ჩვენ ვთხოვთ მოქალაქეებს, სოციალური შეკრებებისაგან, ამ ჯგუფური თავყრილობებისაგან მაქსიმალურად დავიცვათ თავი გარკვეული პერიოდი, ეს არის ძალიან დიდი თხოვნა“ – განაცხადა დღეს, 11 აგვისტოს, აჭარის ჯანდაცვის მინისტრმა, ნინო ნიჟარაძემ.
მინისტრის თქმით, ამ დროისთვის არსებული, უკვე რეკორდული მაჩვენებლებიც კი რომ შენარჩუნდეს, აუცილებელია სოციალურ შეკრებებზე უარის თქმა.
„ჩვენ ამ სიტუაციაში შესაძლოა ვიყოთ ორი კვირის განმავლობაში, მაგრამ ეს სტაბილური დონეც რომ შევინარჩუნოთ, ამისათვის არის აუცილებელი, რომ ყველამ დაიცვას წესი [რეგულაციები], ეს ვერ მოხდება მხოლოდ ერთი მხარის მიერ, ამიტომ ყველამ უნდა დაიცვას, თითოეულმა მოქალაქემ და პრაქტიკულად ყველანაირი სოციალური შეკრებები უნდა იყოს აღკვეთილი ან მინიმუმამდე დაყვანილი.
ესაა დაბადების დღის გადახდა, ქორწილი თუ ასე შემდეგ“ – განაცხადა ნინო ნიჟარაძემ.
მან დღეს განაცხადა, რომ ამ დროისათვის აჭარის ჯანდაცვის სისტემა კორონავირუსის გაზრდილ შემთხვევებს მართავს, თუმცა „სამედიცინო რესურსიც ამოწურვადია“:
„5681 აქტიური შემთხვევაა, საიდანაც 15 პროცენტი არის ჰოსპიტალში. სამედიცინო რესურსებიც არის ამოწურვადი, თითოეულმა მოქალაქემ უნდა გააცნობიეროს არსებული ეპიდსიტუაცია და პასუხისმგებლობით მოეკიდოს წესების დაცვას,“ – განაცხადა მან.
დღეს, 11 აგვისტოს, აჭარაში კორონავირუსის ახალი შემთხვევების ანტირეკორდი დაფიქსირდა – 905 ახალი შემთხვევა 24 საათში. დღევე ცნობილი გახდა, რომ აჭარაში მოქმედ კოვიდკლინიკებს ორი კლინიკა – „მედალფა“ და ქედის სამედიცინო ცენტრი, ჯამში 45 ადგილი დაემატება.
ამავე თემაზე:
კოვიდზე აცრა ბსუ-ში „ფაიზერითაც“ იქნება შესაძლებელი რეგისტრაციის გარეშე
