Batumelebi | 10 ადამიანი დატბორილ მეტროში დაიღუპა – წყალდიდობა და მსხვერპლი ჩინეთში 10 ადამიანი დატბორილ მეტროში დაიღუპა – წყალდიდობა და მსხვერპლი ჩინეთში – Batumelebi
RU | GE  

10 ადამიანი დატბორილ მეტროში დაიღუპა – წყალდიდობა და მსხვერპლი ჩინეთში

მინიმუმ 25 ადამიანი დაიღუპა ჩინეთში, წყალდიდობით დაზარალებულ ხენანის პროვინციაში, მათგან ათი – მეტროში იმყოფებოდა, რომელიც წვიმამ დატბორა – იუწყება „როიტერსი“.

სოციალურ მედიაში გავრცელდა ფოტოები, სადაც ჩანს, რომ მატარებლის მგზავრები მკერდამდე წყალში და სიბნელეში არიან. ქალაქის ხელისუფლებამ განაცხადა, რომ 500-ზე მეტი ადამიანი უსაფრთხოდ გადაიყვანეს დატბორილი მეტროდან.

სპეციალისტების შეფასებით, ეს ყველაზე ძლიერი წვიმა იყო ჩინეთში ბოლო 1000 წლის განმავლობაში.

დაახლოებით 100 000 ადამიანი ევაკუირებულია დედაქალაქ ჟენჯოუში, სადაც სარკინიგზო და საავტომობილო ტრანსპორტის მიმოსვლა შეფერხებულია.

ხენანის პროვინციაში კაშხლები და წყალსაცავები გამაფრთხილებელ დონემდე აივსო, სამაშველო სამუშაოებში ჩართულია ათასობით ჯარისკაცი.

კოკისპირული წვიმების შედეგად, რომლებიც გასულ შაბათ-კვირას დაიწყო, პროვინციაში მინიმუმ 25 ადამიანი გარდაიცვალა და 7 დაიკარგა.

ხენანის პროვინციაში უახლოესი სამი დღის განმავლობაშიც წვიმებია მოსალოდნელი.

ისევე როგორც ბოლოდროინდელი სიცხეები შეერთებულ შტატებში, კანადასა და დასავლეთ ევროპაში დაფიქსირებული ძლიერი წყალდიდობა, ჩინეთში მოსული უხვი ნალექებიც, სავარაუდოდ უკავშირდება გლობალურ დათბობას, განაცხადეს მეცნიერებმა Reuters-თან საუბრისას.

__________________

ფოტო: ევროპის პრესფოტო სააგენტო. EPA/FEATURECHINA

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან