Batumelebi | პეტრას ციხეში საფეხმავლო ხიდს ააშენებენ პეტრას ციხეში საფეხმავლო ხიდს ააშენებენ – Batumelebi
RU | GE  

პეტრას ციხეში საფეხმავლო ხიდს ააშენებენ

პეტრას ციხეში, შიდაციხის ტერიტორიაზე მსუბუქი კონსტრუქციის ლითონის საფეხმავლო ხიდი აშენდება. ხიდზე გადაადგილებას ეტლით მოსარგებლეებიც შეძლებენ.

პროექტის მიხედვით, „ლითონის კონსტრუქცია თავისი სიმყარიდან გამომდინარე არ უნდა აზიანებდეს არქეოლოგიურ-არქიტექტურული კომპლექსის ისტორიულ ნაწილს. ამასთან, ხიდი არ უნდა აკნინებდეს ძეგლის ვიზუალს და თავისი მასშტაბით შესაბამისობაში უნდა იყოს ძეგლის გაბარიტებთან.“

ამონარიდი პროექტიდან

პეტრას ციხეში საფეხმავლო ხიდის მოწყობაზე ტენდერი აჭარის კულტურული მემკვიდრეობის დაცვის სააგენტომ 39 ათასი ლარით გამოაცხადა. წინადადებების მიღება 2021 წლის 29 ივლისს დაიწყება და 3 აგვისტოს დასრულდება.

ციხის ტერიტორიაზე საფეხმავლო ხიდი ტენდერში გამარჯვებულთან ხელშეკრულების გაფორმებიდან 70 დღეში უნდა აშენდეს. სატენდერო დოკუმენტაციას თან ახლავს ხიდის პროექტიც.

ხიდი პეტრას ციხის ტერიტორიაზე/ფოტომონტაჟი და ვიზუალიზაცია:

ფოტო ტენდერიდან

ფოტო ტენდერიდან

პეტრას ციხე, რეაბილიტაციის გამო, ვიზიტორებისთვის 2019 წლის 12 აგვისტოდან 2021 წლის 18 მაისამდე დაკეტილი იყო.

ადმინისტრაციული შენობა/ვიზიტორთა ცენტრი, არქეოლოგიური მუზეუმი/სამუზეუმო სივრცეები, კინოსაპროექციო ოთახი, კაფე, სავალი ბილიკები, საპირფარეშო, მინის მოაჯირი ზღვის მხარეს, ადაპტირებული ლიფტები – ამ ყველაფრის მოწყობაში აჭარის ბიუჯეტიდან 2 მილიონამდე ლარი დაიხარჯა.

რეაბილიტირებული ციხე ვიზიტორებისთვის ღიაა:

რეაბილიტირებული პეტრას ციხე [ფოტო]

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com