ძველ ბათუმში ისტორიულ სახლებზე სპილენძის საწვიმარი მილები მოიპარეს, შეინიშნება ასევე ჭების ლუქების მოპარვის ფაქტები. ამის შესახებ დღეს ბათუმის საკრებულოს სხდომაზე იურიდიული კომისიის თავმჯდომარემ, დავით მახარაძემ განაცხადა. მის მიერ გაჟღერებული ინფორმაცია ბათუმის მერის მოვალეობის შემსრულებელმა არჩილ ჩიქოვანმა დაადასტურა.
„ძველ ბათუმში არის ძალიან ბევრი ისტორიული და ლამაზი შენობა, ამ შენობაზე არის სპილენძის ხარისხის საწვიმარი მილები. ძალიან ბევრ შენობებზე, თითქმის 80 პროცენტზე, დაახლოებით 2 მეტრ სიმაღლეზე, სადაც ადამიანი მიწვდება, არის მოპარული. ვთხოვოთ პოლიციას, მიაქციონ ამას ყურადღება და თუ ფაქტზე ვერ იჭერენ ადამიანს, ის მაინც გააკეთონ, რომ გავაფრთხილოთ, სადაც ამას იბარებენ, რომ არ ჩაიბარონ“, – განაცხადა დავით მახარაძემ.
ბათუმის მერის მოვალეობის შემსრულებლის, არჩილ ჩიქოვანის განმარტებით, ამ საქმეში პოლიცია უკვე ჩართულია, მოპარული ნივთების ნაწილი უკვე ამოღებულია, ხოლო რამდენიმე ფაქტზე საგამოძიებო პროცედურები ახლაც მიმდინარეობს.
„დატაცების ფაქტები დაფიქსირდა ძველ ბათუმსა და ქალაქის სხვა ნაწილებში. ეს ეხება სანიაღვრე ჭების ლუქებისა და ა.შ. დატაცებას. თუმცა მინდა დავაზუსტო, რომ შინაგან საქმეთა სამინისტროს მხრიდან მყისიერი რეაგირება განხორციელდა, შემთხვევების უმეტესი ნაწილი გამოვლენილია, ამოღებული და დაბრუნებულია ბათუმის წყლისთვის, ინფრასტრუქტურის სამსახურისთვის და მუნიციპალური სერვისების სააგენტოსთვის. რამდენიმე ფაქტზე საგამოძიებო პროცედურები ახლაც მიმდინარეობს. თანამშრომლობის საფუძველზე კონტროლი გამკაცრებულია“, – განაცხადა არჩილ ჩიქოვანმა.
