Batumelebi | ხულოში, კურორტ გოდერძიზე, კოტეჯების აშენებისა და ხეების დარგვის პირობით 10 ნაკვეთი იყიდება ხულოში, კურორტ გოდერძიზე, კოტეჯების აშენებისა და ხეების დარგვის პირობით 10 ნაკვეთი იყიდება – Batumelebi
RU | GE  

ხულოში, კურორტ გოდერძიზე, კოტეჯების აშენებისა და ხეების დარგვის პირობით 10 ნაკვეთი იყიდება

ხულოს მუნიციპალიტეტში, კურორტ გოდერძიზე აჭარის ფინანსთა და ეკონომიკის სამინისტრო 10 ნაკვეთს 2 ლოტად [5-5 ნაკვეთი] ყიდის. ქონება ელექტრონულ აუქციონზე პირობებით იყიდება. აუქციონები დაწყებულია და 2021 წლის 18 ივნისს დასრულდება.

მთავარი პირობა კოტეჯების [მათ შორის კოტეჯის ტიპის სასტუმროების] აშენებაა. ამასთან, მიწის ნაკვეთების მყიდველ[ებ]მა ჯამში 100 ძირი ხე უნდა დარგონ [თითოეულ ნაკვეთზე ან მის მიმდებარედ 10 ხე].

პირველ აუქციონზე, 477, 483, 490, 442 და 445 კვ.მეტრი ფართობის ნაკვეთების საწყისი გასაყიდი ფასი 718 ათასი ლარია [ვაჭრობის ბიჯი 20 ათასი ლარი, საგარანტიო თანხა – 179 500 ლარი];

მეორე აუქციონზე კი, 571, 523, 471, 371 და 378 კვ.მეტრი ფართობის მქონე ხუთი ნაკვეთი იყიდება, რომელთა საწყისი გასაყიდი ფასი 711 ათასი ლარია [აქაც ვაჭრობის ბიჯი 20 ათასი ლარია, საგარანტიო თანხა კი – 177 750 ლარი].

რაც შეეხება აუქციონის პირობებს, ორივე შემთხვევაში თითქმის იდენტურია, ერთი განსხვავებით – მეორე აუქციონში გამარჯვებულს დამატებით ევალება, რომ მან, მისთვის საკუთრებაში გადაცემული ქონების მიმდებარედ, აჭარის ავტონომიური რესპუბლიკის საკუთრებაში არსებულ 12 238 კვ.მეტრ მიწის ნაკვეთზე სარეკრეაციო სივრცე მოაწყოს. ამასთან, ქონების შემძენს ევალება სარეკრეაციო სივრცის მოვლა „სასტუმროს პროფილის შენარჩუნების ვადით, მესამე პირთათვის შეუზღუდავი წვდომის უზრუნველყოფით“.

აუქციონის პირობები:

  • საბოლოო საპრივატიზებო საფასურის (“ბე“-ს (საწყისი საპრივატიზებო საფასურის 25%-ის ოდენობით) გამოკლებით) გადახდა აუქციონის დასრულებიდან 2 ეტაპად, კერძოდ:
    2021 წლის 1-ელ დეკემბრამდე არანაკლებ 25%-ის გადახდა;
    2022 წლის 1-ელ დეკემბრამდე დარჩენილი საპრივატიზებო საფასურის გადახდა.
  • შესაბამისი ნასყიდობის ხელშეკრულების გაფორმებიდან არაუგვიანეს 2 თვის ვადაში უპირობო და გამოუხმობი საბანკო გარანტიის წარმოდგენა არანაკლებ 10 000 ლარის ოდენობით, რომლის ვადაც არანაკლებ 2 თვით უნდა აღემატებოდეს საინვესტიციო ვალდებულების შესრულების ვადას;
  • არაუგვიანეს 2021 წლის 30 ნოემბრისა არქიტექტურული პროექტის მომზადებამდე, სამთოსათხილამურო კურორტის ლანდშაფტის შესაბამისი საპროექტო ობიექტის (ყოველი ნაკვეთისათვის ცალ-ცალკე) ვიზუალური ესკიზის (4 მხრიდან ხედი მოცულობაში, საპროექტო ობიექტ(ებ)ის გაბარიტების, ფასადის მოსაპირკეთებელი მასალების ჩვენებით) სამინისტროში შესათანხმებლად წარმოდგენა;
  • არაუგვიანეს 2022 წლის 30 ივნისისა საკუთრებაში გადაცემულ მიწის ნაკვეთებზე განსათავსებელი კოტეჯების ტიპის შენობა-ნაგებობების (ცალ-ცალკე ყოველ ნაკვეთზე მხოლოდ ერთი), არანაკლებ სამ ნაკვეთზე კოტეჯის ტიპის სასტუმროს მშენებლობის ნებართვის მიღება;
  • არაუგვიანეს 2024 წლის 30 ნოემბრისა საკუთრებაში გადაცემულ მიწის ნაკვეთებზე განსათავსებელი შენობა-ნაგებობების მზიდი კონსტრუქციის მშენებლობის დასრულება; არაუგვიანეს 2025 წლის 30 ნოემბრისა შენობა-ნაგებობების ექსპლუატაციაში გაშვება/ამოქმედება; სასტუმროს პროფილის შენარჩუნება არანაკლებ 20  წლის ვადით;
  • აღნიშნულ პროექტში არანაკლებ 2 მილიონი ლარის ინვესტიციის განხორციელება.
  • აღნიშნული პროექტის ექსპლუატაციაში გაშვებიდან არაუგვიანეს 1 წლის ვადაში, აჭარის ავტონომიური რესპუბლიკის გარემოს დაცვისა და ბუნებრივი რესურსების სამმართველოს ან/და სსიპ „აჭარის სატყეო სააგენტო“-ს ან/და ხულოს მუნიციპალიტეტის მერიის რეკომენდაციით და მითითებულ პერიოდში მოახდინოს თითო საკოტეჯე ადგილას ან მის მიმდებარედ არანაკლებ 10 ხის დარგვა.

ამავე თემაზე:

მთავრობა ბობოყვათის სანაპიროზე 28 ჰექტარს ყიდის – საწყისი ფასი 48 მილიონია

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com