მთავარი,სიახლეები

ჯარიმების გასაუქმებლად მეწარმეებს დღეიდან შეუძლიათ მიმართონ შემოსავლების სამსახურს

18.05.2021 • 2542
ჯარიმების გასაუქმებლად მეწარმეებს დღეიდან შეუძლიათ მიმართონ შემოსავლების სამსახურს

მეწარმეებს, რომლებსაც დავალიანებაზე ერიცხებათ ჯარიმა-საურავები, შესაძლებლობა აქვთ არ გადაიხადონ ჯარიმა, თუ პირველ აგვისტომდე მიმართავენ შემოსავლების სამსახურს და გააფორმებენ შესაბამის შეთანხმებას. შეთანხმება გულისხმობს გადასახადის [ძირითადი] თანხის გადახდას 2021 წლის 31 დეკემბრამდე.

მეწარმეებს შეუძლიათ დღეიდან, 18 მაისიდან, უკვე მიმართონ შემოსავლების სამსახურს ასეთი შეთანხმების გასაფორმებლად. მიმართვის ბოლო ვადა 2021 წლის პირველი აგვისტოა.

საქართველოს ფინანსთა სამინისტროს ინფორმაციით:

  • „გადასახადის გადამხდელს, რომელსაც აქვს მიმდინარე წლის 1-ელ აპრილამდე წარმოშობილი აღიარებული/არაღიარებული საგადასახადო დავალიანება, შესაძლებლობა ექნება გადასახადის (ძირითადი) თანხის გადახდის პირობით, სრულად შეიმციროს დარიცხული ჯარიმა/საურავები.
  • ამისთვის გადასახადის გადამხდელმა მიმდინარე წლის 1-ელ აგვისტომდე უნდა მიმართოს შემოსავლების სამსახურს საგადასახადო შეთანხმების გაფორმების მოთხოვნით და გადასახადის (ძირითადი) თანხის გადახდა განხორციელდეს 2021 წლის 31 დეკემბრამდე;
  • გადასახადის გადამხდელებს, რომელთა მიმდინარე საგადასახადო დავალიანება არსებითად შედგება მხოლოდ სანქციისაგან, საგადასახადო შეთანხმება გაუფორმდებათ ანალოგიური პირობებით, საგადასახადო დავალიანების 30%-ის გადახდის შემთხვევაში;
  • აღნიშნული ინიციატივა ეხება ყველა გადასახადის გადამხდელის საგადასახადო დავალიანებებს (მათ შორის საგადასახადო დავაში არსებულ დავალიანებებს), გარდა იმ შემთხვევებისა, როდესაც ამ გადამხდელთან მიმართებაში არსებობს მიმდინარე სისხლის სამართლის საქმე სისხლის სამართლის კოდექსით განსაზღვრულ ეკონომიკურ დანაშაულზე;
  • მსგავსი ფორმით და პირობებით წარმოდგენილი განცხადება დაკმაყოფილდება ავტომატურ რეჟიმში განხილვის დამატებითი შიდა პროცედურების გარეშე (ნებისმიერი სხვა სახით წარმოდგენილი განცხადების განხილვა მოხდება დღეს მოქმედი განხილვის ფორმით);
  • ინიციატივა ჯარიმა/საურავების პატიების შესახებ ერთჯერადი ხასიათის არის და უკავშირდება გადასახადის გადამხდელებისათვის პანდემიიდან გამოწვეული სირთულეების დაძლევას;
  • აღნიშნული ინიციატივის ფარგლებში სრულად ხდება კუთვნილი გადასახადის (ძირითადი) თანხის გადახდა. შედეგად, ინიციატივის პირობების გათვალისწინებით და მიმდინარე საგადასახადო ადმინისტრირების პირობებში არსებითად გამოირიცხება კონკურენტული პირობების დარღვევა ბიზნეს სექტორში და არ დაზიანდება გადასახადის გადახდის კულტურა, რომელიც არსებითად გაუმჯობესებული იყო პანდემიამდე პერიოდში“.

აღნიშნული ინიციატივა ფინანსთა მინისტრის ლაშა ხუციშვილის განცხადებით, მთავრობამ 17 მაისს მოიწონა.

გადაბეჭდვის წესი


ასევე: