„ოცნების ქალაქის“ ტერიტორიას სამინისტრო გასაყიდად ამზადებს

აჭარის მთავრობა „ოცნების ქალაქის“ ტერიტორიას, სადაც თვითნებურად აშენებული სახლები დგას, საინვესტიციოდ ამზადებს. ფრიდონ ხალვაშის გამზირის მიმდებარედ არსებული ტერიტორიის საერთო ფართობი 140 551 კვ/მ-ია.

აჭარის ფინანსთა და ეკონომიკის სამინისტრო ამჯერად აღნიშნული ტერიტორიის განაშენიანების დეტალურ გეგმას [გდგ-ს] შეისყიდის. ტერიტორიის ერთ-ერთ კვარტალში სოციალური დანიშნულების მრავალბინიანი საცხოვრებელი კომპლექსიც უნდა დაგეგმარდეს, რომელშიც ბინებს „ოცნების ქალაქში“ მცხოვრებლებს გადასცემენ.

„დამკვეთის მიერ მითითებულ საპროექტო კვარტალზე დაგეგმარდეს სოციალური დანიშნულების მრავალბინიანი საცხოვრებელი კომპლექსი, ხოლო საცხოვრებელი კვარტალების განვითარებისათვის გამოყოფილი დარჩენილი კვარტალები დაგეგმარდეს საცხოვრებელი კომპლექსებისათვის, საინვესტიციოდ“ – აღნიშნულია კონკურსის ტექნიკურ დავალებაში.

კონკურსი სამინისტრომ დღეს, 29 აპრილს, გამოაცხადა, სავარაუდო ღირებულებით – 844 ათასი ლარი. კონკურსი 31 მაისს დასრულდება.

ტერიტორიის „გდგ-ს შემუშავებისას ძირითადი აქცენტი გაკეთდეს საპროექტო ტერიტორიაზე მრავალბინიანი საცხოვრებელი სახლების განთავსებაზე, ასევე საჯარო სკოლის (საორიენტაციოდ 700 მოსწავლეზე), საბავშვო ბაღისა (საორიენტაციოდ 150 აღსაზრდელზე) და სარეკრეაციო ზონის განთავსებაზე“, – აღნიშნულია ტექნიკურ დავალებაში.

„გდგ აუცილებელია ამჯერად ამ ტერიტორიისთვის, რათა შემდგომში განაშენიანებამ აქ ქაოსური ხასიათი არ მიიღოს“ – გვითხრეს სამინისტროს საკონკურსო კომისიაში.

რაც შეეხება „ოცნების ქალაქში“ მცხოვრებთათვის ახალ სოციალურ საცხოვრებელ კომპლექსს, ის იმ ტერიტორიის მომიჯნავედ აშენდება, სადაც უკვე მიმდინარეობს 582-ბინიანი კომპლექსის მშენებლობა [რომელშიც ასევე განსახლდება აღნიშნული ჩასახლებიდან ოჯახების ნაწილი]. ანუ, სოციალური კომპლექსი არა ხალვაშის გამზირის მიმდებარედ, არამედ მისგან დაშორებით აშენდება.

„ოცნების ქალაქის“ ტერიტორია: 1 – ადგილი, სადაც სოციალური სახლების მშენებლობა მიმდინარეობს; 2 – ტერიტორია, სადაც საცხოვრებელი კომპლექსებიც დაგეგმარდება საინვესტიციოდ.

ტექნიკური დავალების მიხედვით, „ახალი კომპლექსის საცხოვრებელი სახლების ბოლო იატაკის ნიშნული არ უნდა აღემატებოდეს 37 მეტრს. საცხოვრებელი ბინების რაოდენობა და ფართობები კონკურსში გამარჯვებულმა დამატებით უნდა შეათანხმოს სამინისტროსთან (საცხოვრებელი ბინების ფართობების მინიმუმი საორიენტაციოდ განისაზღვროს 42 კვ/მ-ით. დამატებით აივნების გათვალისწინებით).

საცხოვრებელი ოთახების მეორადი განათება დაუშვებელია. დაგეგმარების დროს გათვალისწინებულ უნდა იქნას მრავალსულიანი ოჯახების განთავსების საკითხებიც. კლიმატური პირობებიდან გამომდინარე მიწისპირა სართული გამოყენებულ უნდა იქნას საზოგადოებრივი დანიშნულებითა და პარკინგის მოსაწყობად. მოეწყოს ქანობიანი გადახურვა. საორიენტაციო სამშენებლო ფართობი – არანაკლებ 60 000 კვ/მ. საპროექტო მიწის ნაკვეთი დახლოებით შეადგენს 3 ჰექტარს. საპროექტო ტერიტორია უნდა დაზუსტდეს სამინისტროსთან“.

—

„ოცნების ქალაქში“ საცხოვრებელი კომპლექსის მშენებლობასთან დაკავშირებით „მეორე ფაზის შესაბამისი პროცედურების დაწყება,“ აჭარის მთავრობის თავმჯდომარემ დღეს, 29 აპრილს, კონკურსის გამოცხადებამდე დააანონსა. „ეს სტრატეგიული პროექტია,“ – დასძინა თორნიკე რიჟვაძემ.

„ოცნების ქალაქში“ მცხოვრებმა ადამიანებმა არაერთი აქცია გამართეს. ისინი ითხოვენ იმ კრიტერიუმების დადგენას, რომელთა მიხედვითაც განისაზღვრება ვის ეკუთვნის ბინა საცხოვრებელ კორპუსებში, რომლებსაც ახლა აშენებენ.

იგივე პროგრამა ამჯერად 2021-2024 წლებზეა გაწერილი და 70 მილიონი ლარით დაფინანსებას ითვალისწინებს:

„ოცნების ქალაქში“ მცხოვრებთა აქცია აჭარის მთავრობის სახლთან